Azər Əliyevin "milliləşdirilməsi" niyə gecikir? - AÇIQLAMALAR
“Neftçi” Azər Əliyevi transfer edəndə hamı sevindi ki, milli komandanı gücləndirəcək yeni futbolçuya sahib olduq.
Amma paytaxt təmsilçisinin özü belə hazırda onu yerli statusla oynada bilmir. Klubun yeni idman direktoru Zaur Əzizov Azər transfer olunandan sonra iddialı açıqlama vermişdi ki, vinger premyer-liqa matçlarında azərbaycanlı kimi meydana çıxacaq. Amma sonradan nədənsə işlər tərsinə getdi. Artıq 5 turdu futbolçu legioner kimi çıxış edir. Dəfələrlə bu məsələ ilə bağlı həm “Neftçi”yə, həm də AFFA-ya müraciət etmişik. Lakin bir qayda olaraq eyni cavabı eşitmişik:
“Dəyişən heç nə yoxdu, tezliklə həll olunacaq”. Samir Abasov da artıq cana doyub. Premyer-liqanın 19-cu turunda “Sumqayıt”a 2:1 hesabı ilə qalib gəldikləri matçdan sonra təcrübəli mütəxəssis Azərlə bağlı suala belə cavab verib: “Klubumuz bununla sıx məşğul olur. Mənim istəyim prosesin tez baş verməsidi. Bu oyunda heç bir plan pozulmadan o oynamalıydı. Çünki daha hazırlıqlı idi. Limitin qəti əleyhinəyəm. Amma bundan da çıxış yolu axtarmalıyıq. Azər məsələsini klub rəhbərliyi daha yaxşı bilər”.
Məsələ yavaş-yavaş aydın olur. Samir Abasov yalan danışmağı xoşlayan adam deyil. Onun dini baxışı da buna imkan vermir. Amma bəzən həqiqəti gizlətsə də, üstüörtülü şəkildə jurnalistlərə, ictimaiyyətə açıqlama verir. Azərlə bağlı problemin konkret səbəbini söyləməsə də, məsələnin klub rəhbərliyindən qaynaqlandığını deyir.
Ydınızdadısa, fevralın 2-də AFFA İcraiyyə Komitəsinin iclası keçirilmişdi. Həmin gün icraçı vitse-prezident Elxan Məmmədov məsələyə belə münasibət bildirmişdi:
“Azər Əliyev dünən kubok oyununda meydana çıxdı. Amma o, əcnəbi futbolçudu. “Neftçi” şifahi olaraq bizə müraciət edib. Lakin futbolçu tərəfindən müraciət olmayıb. Prosedur belədi ki, futbolçu ərizə yazmalı, onu qəbul etməliyik və Rusiya Futbol İttifaqına göndərməliyik. Onlardan da məktub gəlməlidi ki, bu oyunçu Rusiya yığmasında oynamayıb. Daha sonra FIFA və UEFA-ya müraciət etməliyik. Yalnız bundan sonra milliyə cəlb edilə bilər”.
Artıq qaranlıq qalan nəsə yoxdu. Azər Əliyev özü hələ də AFFA-ya müraciət etmir ki, onu “milliləşdirsinlər”. Əslində bu iş assosiasiyanın əlində su içmək kimi bir şeydi. Necə olur ki, “Sumqayıt”ın üzvləri Əli Qurbani, Höccət Haqverdi, “Sabah”dan İldar Alekperov, Abdulax Xaibulayevin “milliləşdirilməsi” qısa zamanda baş verir, amma Azərlə bağlı problem yaşanır? Əlbəttə, bu, AFFA-dan qaynaqlanan məsələ deyil. Azər özü bunu istəmir. Niyə?
Redaksiyamıza bununla bağlı maraqlı informasiya daxil olub. Sən demə, klub rəhbərliyi ilə futbolçu arasında maliyyə məsələsində problem yaşanıb. “Neftçi” rəsmiləri Azər Əliyev və menecerinə vəd olunan, onu klubda oynamağa razı salan İlqar Qurbanova lazımi pulu ödəməyib. Flaqman başbilənləri əvvəlcə bunu edəcəklərinə söz versələr də, sonradan vədə əməl etməyiblər. Bu səbəbdən də futbolçu “milliləşdirilmək” üçün lazım olan sənədləri AFFA-ya göndərmir. Məsələ ilə bağlı klubun rəsmi mövqeyini öyrənməyi özümüzə borc bildik. “Neftçi”nin Media, Marketinq və İctimaiyyətlə Əlaqələr Departementinin rəhbəri Rüstəm Allahverdiyevlə əlaqə saxladıq:
“Əvvəlcə onu deyim ki, İlqar Qurbanov Azər Əliyevi “Neftçi”yə gətirməyib. Onun bu məsələyə aidiyyatı yoxdu. Azərin meneceri ilə də problemimiz yoxdu. “Milliləşdirilmə” prosesi ilə bağlı işlər gedir. Tam həll olunanda ictimaiyyətə açıqlama veriləcək”.
Gördüyünüz kimi, klub iddianı təkzib edir. Amma Azərin də “milliləşdirilməsi” alınmır. Bunun səbəbini nə “Neftçi”, nə də AFFA konkret açıqlayır. Olan isə ölkə futboluna olur. Yaxın günlərdə milli komandanın yoxlama oyunları üçün heyəti açıqlanacaq. Və böyük ehtimalla Azər Əliyevin adına rast gəlməyəcəyik. Çünki vingerin Azərbaycan pasportu yoxdu. Bu səbəbdən də Canni de Byazi komandaya fayda verə biləcək futbolçunun xidmətindən yararlana bilməyəcək. Necə ki, Samir Abasov azərbaycanlı olan Azəri legioner kimi oynadır. Bunun üçün hər həftə taktiki sxem üzərində baş sındırır...
İLKİN SULTANLI
Digər xəbərlər
