“Səbail”lə qarşılaşma “Old Wolf” üçün sonuncu olacaq - AÇIQLAMA
“Keşlə” adı artıq tarixə qovuşur.
Klub yaxın günlərdə “Şamaxı” kimi fəaliyyət göstərək. Sənan Qurbanovun yetirmələri premyer-liqanın 18-ci turunda “Sabah” ilə son ev oyununa çıxdı. Şamaxılı azarkeşlərlə görüş isə martın 18-də baş tutacaq.
Görəsən, “Old Wolf” fanklubu komandanı Şamaxıda da dəstəkləyəcəkmi? Bu sualı azarkeş qrupunun rəhbəri Elnur Yusifova ünvanladıq: “Keşlə”nin son ev oyununa çıxmasına çox pis olduq. Öncə neçə il dəstəklədiyimiz “İnter” “Keşlə” oldu. Alışmaq çətin idi. Yavaş-yavaş uyğunlaşırdıq ki, “Keşlə”ni də əlimizdən aldılar. Üzvlərimizin çoxu inciyib. Ona görə ki, klubu əllərində oyuncaq kimi oynadırlar. Bizə maraqlı gələn odu ki, niyə həmişə bu hal komandamızın başına gəlir? Rəhbərlik bilər düzünü, amma biz azarkeş olaraq istəməzdik komandamız “Şamaxı” adı ilə çıxış etsin. Şamaxıda olan ilk oyuna getmək istəyirik. Amma bu, rəhbərlikdən asılıdı. Onlar istəyəcək, bizə şərait yaradacaq? Hələ komandanın Şamaxıya getməsi ilə bağlı rəsmi qərar çıxmayıb. Bu gün-sabah nə olacağını bilmirik. Şamaxıda olan qarşılaşmalarda isə hər dəfə dəstəkləyib-dəstəkləməyəcəyimiz bəlli deyil. Çünki bizdən asılı olmayan səbəblər ola bilər. İş saatı ilə üst-üstə düşə bilər, oyun axşam olsa, gedib-gəlmək məsələsi var. Bunu da qeyd edim ki, biz Bakıdakı bütün görüşlərdə komandaya dəstək olacağıq. Növbəti turun “Səbail”lə son səfər oyunu “Old Wolf” adı altında fanatların son matçı olacaq. Azarkeşlərimiz “Şamaxı” adına hazır deyil. Bizim üçün “Keşlə” var idi. Düzdü, hər şey qalır, dəyişən ad, loqo və stadiondu. Şamaxıda azarkeş qrupu var. Bəlkə onları götürəcəklər özlərinə azarkeş kimi, bizə ehtiyac duymayacaqlar? Suallar çoxdu. Ona görə də hər şeyi zamanın öhdəsinə buraxırıq”.
GÜNAY VƏLİYEVA
Digər xəbərlər
