"Old Wolf" son oyunda “Keşlə”ni dəstəkləyəcək? - AÇIQLAMA
Bu gün "Old Wolf" azarkeş qrupunun 4 yaşı tamam olur.
Saylarının azlığına rəğmən, bu müddətdə bütün oyunlarında “Keşlə”nin yanında olublar. Azarkeş qrupunun rəhbəri Elnur Yusifov şəxsi "feysbuk" səhifəsində paylaşım edərək, "Qəbələ" ilə səfər matçında son dəfə komandaya dəstək verəcəklərini bildirib.
Görəsən, "Old Wolf" "Şamaxı" adı altında da komandanın yanında olacaq? Yusifovu dinləyək: "Old Wolf"un 4 yaşı olur. "Keşlə" adı altında "Qəbələ" ilə son oyunda azarkeşlərin olub-olmayacağını bilmirəm. Amma mən Qəbələyə gedəcəm. Son dəfə pankart açacam. Görüşün nəticəsindən asılı olmayaraq, sonadək komandanı dəstəkləyəcəm. Artıq 4 ildi bu azarkeş qrupu var. Çox gözəl hisslərdi fanklubu bu yerə gətirib çıxarmaq. 4 il ərzində çiyinlərimdə daşıdım. Elə bir oyun olmayıb ki, getməyək. Hər matçda, sayımızdan asılı olmayaraq, "Keşlə"ni dəstəkləmişik. Yalnız pandemiya dövründə tribunada yer ala bilməmişdik. Bu da bizdən asılı olmayan səbəb idi. İsti, soyuq, yağış, qar demədən komandamızı dəstəkləyən sadiq azarkeşlərə burdan təşəkkür edirəm. "Şamaxı" adı altında nə olacaq, necə edəcəyik - hələ ki heç nə bilmirəm. Klubdan da nə təklif, nə də bununla bağlı söhbət olub. Yalnız bunu deyim ki, "Keşlə" varsa, "Old Wolf" var, yoxdusa, biz də yoxuq”.
GÜNAY VƏLİYEVA
