Bir neçə gündü idman mediasının ən çox müzakirə etdiyi məsələ “Keşlə” niyə Şamaxıya köçüb, yeni adla çempionat oyununa çıxması” mövzusudu.

Fevraldan gündəmə gələn məsələ martda daha da aktuallaşmışdı. Demək olar, hamı - ölkə futbolu ilə maraqlanan azarkeşlər, futbol ictimaiyyətinin nümayəndələri, idman mətbuatı Zaur Axundovun rəhbəri olduğu “qırmızı-ağlar”ın martın 18-də “Sumqayıt”ı artıq yeni ünvanda, “Şamaxı” adı altında qonaq edəcəyini gözləyirdi.

Ancaq həftənin əvvəlində PFL premyer-liqanın 20-ci turunun təqvimini açıqlayarkən “Keşlə” – Sumqayıt” qarşılaşmasının əvvəlki kimi “ASK Arena”da keçiriləcəyinin anonsunu verincə, aləm bir-birinə dəydi. Ramin Musayevin rəhbərlik etdiyi quruma “niyə belə oldu” sualı yağış kimi yağmağa başladı. Çempionatın təşkilinə cavabdehlik daşıyan təşkilatın Mətbuat və İctimaiyyətlə Əlaqələr Departamentinin rəhbəri Aslan Şahgəldiyev çıxılmaz vəziyyətə düşdüklərini nəzərə alıb təxminən “biz bu günə kimi heç yerdə deməmişik ki, “Keşlə” – “Sumqayıt” matçı Şamaxıda keçiriləcək” şəklində fikir səsləndirdi. Bu yerdə ona “PFL olaraq bu xəbərlər ortaya çıxanda təkzib də etməmişdiz” demək istərdik. Necə olur, “qırmızı-ağlar”ın futbolçuları, baş məşqçisi mətbuata Bakı ilə vidalaşdıqlarını söyləyirlər, PFL isə buna reaksiya vermir, nə Sənan Qurbanova, nə də “Keşlə”nin futbolçularına “sizə kim deyib ki, Şamaxıya gedirsiz” sualını ünvanlamır. Deməli, belə plan olub, “Sumqayıt”la qarşılaşmanın Şamaxıda keçirilməsi nəzərdə tutulub. Ancaq bu plan baş tutmayıb. Hər şey isə PFL-in təftiş qrupunun Şamaxı şəhər stadionuna baş çəkməsindən sonra başlayıb.

Kluba yaxın mənbələrdən bizə daxil olan məlumata görə, martın əvvəlində komandaya “kimyaçılar”la ev oyununun yeni məkanda keçiriləcəyi ilə bağlı xəbərdarlıq olunub və vaxtında yır-yığış etmələri tapşırılıb. “Keşlə”də artıq hamı çemodan əhval-ruhiyəsində Şamaxıya gedəcəkləri günü gözləyirmiş. Lakin Şamaxı şəhər stadionu təftiş olunandan sonra PFL-ə bəlli olub ki, arena premyer-liqa matçını keçirməyə hazır deyil. Arenada nəinki işıqlandırma sistemi, Əsasnamədə qeyd olunan tələblərin bir çoxu yoxdu. Lakin PFL rəhbərliyi bunu ictimaiyyətə açıqlamaq istəmir. Çünki AFFA rəhbərliyi təxminən bir ay öncədən artıq martda köçün reallaşacağını açıqlamışdı. Yəni PFL rəsmiləri assosiasiya rəhbərliyini yalançı çıxarmamaq üçün məsuliyyəti öz boynuna çəkməyi lazım bilib.

Yeri gəlmişkən, Lisenziyalaşdırma Qrupunun rəhbəri Elçin Məmmədovun qəzetimizə verdiyi “Keşlə”nin “Şamaxı” olması və yeni ünvana köçməsi UEFA-dan yox, PFL-dən asılıdı” açıqlaması da qeyri-səmimidi. Mənbəmiz onu da bildirdi ki, UEFA o zaman yeni yaranan klubu əvvəlkinin varisi kimi tanıyır ki, artıq tarixin yaddaşına köçənin heç bir qurum və fiziki şəxsin qarşısında maliyyə öhdəliyi olmasın. Ancaq “Keşlə” ilə bağlı hər şey fərqlidi. Futbolçuların iki ay maaş almamsına baxmayaraq, AFFA-nın bu sahəyə cavabdeh şəxsləri tələm-tələsik bütün futbolçulara klubun onlara borcu olmaması ilə bağlı sənəd imzalatdırıb. Bir sözlə, üst-üstə yığılan problemlər, stadionun çempionat oyununu qəbul etməyə hazır olmaması PFL-i çətin vəziyyətə salıb ki, bunu da yuxarıda qeyd etdiyimiz səbəbdən ictimaiyyətə açıqlaya bilmirlər.

RƏŞAD