Son iki gündə MHL-də keçirilən oyunlarla bağlı ən önəmli məqam, təbii ki, Aleksandr Oveçkinin snayperlər siyahısında 3-cü pilləyə yüksəlməsidi.

“Vaşinqton”un 36 yaşlı kapitanı “Aylenders”lə oyunda müntəzəm çempionatlardakı 767-ci qolunu vurdu. Rusiyalı ulduz indi yalnız iki kanadalıdan – Qordi Hou (801) ilə Ueyn Qretskidən (894) geri qalır.

“Toronto”nun hücumçusu Oston Mettyus isə yaxşı yox, pis əməllə yadda qalıb. MHL-in təhlükəsizlik departamenti onu “Baffalo”nun hücumçusu Rasmus Dalinə hücum etdiyinə görə 2 oyunluq cəzalandırıb. Münaqişə 3-cü periodun sonuna 5 dəqiqə qalmış baş verib. “Baffalo”nun qapısı önündə mübarizə aparan Dalin və Mettyus əvvəlcə bir-birinə zərbə endirib, əzəbləri dözməyən amerikalı ardından hokkey çubuğu ilə isveçlinin boynuna vurub. Hər iki hokkeyçi epizodun sonunda 2 dəqiqəliyə meydandan qovulub. Göründüyü kimi, MHL Mettyusu əlavə cəzaya da layiq bilib. 56 oyunda 45 qol vuran Ostonun hazırda snayperlər cədvəlinə başçılıq etdiyini də xatırladaq.

Bu arada ötən həftənin ən yaxşı hokkeyçilərinin adı açıqlanıb. “Çikaqo”nun 3 oyunda 10 (1+9) xal toplayan, klub tarixinin bombardirləri siyahısında 2-ci yerə yüksələn hücumçusu Patrik Keyn həftənin 1-ci ulduzudu. “Kalqari”nin qolkiperi Yakob Markstrem həftənin 2-ci ulduzudu. Komanda həftəboyu 3 qələbə qazanıb, isveçli hər oyunda orta hesabla 0,67 qol buraxıb. Nəhayət, həftənin 3-cü ulduzu “Aylenders”in kapitanı Anders Lidi. Amerikalı forvard 4 oyunda 7 qol və 1 məhsuldar ötürmə ilə yadda qalıb.