Türkiyəli mütəxəssis qızlardan ibarət milli komandalarımızı çalışdıracaq

Voleybol üzrə yeniyetmə və gənc qızlardan ibarət milli komandalarımızda baş məşqçi vəzifəsinə təyinat gerçəkləşib.

"Football-plus.az" xəbər verir ki, bu barədə Azərbaycan Voleybol Federasiyası məlumat yayıb.

Bildirilib ki, türkiyəli mütəxəssis Gökhan Edmanla anlaşma əldə olunub.

Edmanın rəhbərliyi altında Türkiyənin gənc qızlardan ibarət millisi 2011-12-ci illər mövsümündə Avropa çempionu olub, 2012–13-cü illərdə isə dünya çempionatını 5-ci pillədə başa vurub. O, həmçinin müxtəlif illərdə Türkiyənin A milli, A2, gənc və yeniyetmə komandalarını çalışdıraraq Balkan çempionluğu və “Spring Cup” turnirində bir neçə dəfə titullar qazanıb.

Klub karyerasında “Eczacıbaşı”, “Qalatasaray”, “Vakıfbank Günəş Sığorta” və “Sarıyer Bələdiyəspor” komandalarında baş məşqçi kimi fəaliyyət göstərən mütəxəssis 1998–99-cu illər mövsümündə “Əczacıbaşı” ilə Avropa Konfederasiya Kubokunun (CEV Cup) çempionu olub, 1999–2000-ci illərdə Avropa Çempionlar Liqasında 3-cü yeri tutub. “Qalatasaray” ilə də Avropa Konfederasiya Kubokunda bürünc medal qazanan Edman “Əczacıbaşı” A qadın komandası ilə iki dəfə Türkiyə çempionu olub.

Marmara Universitetinin məzunu olan Edman uzun illər Türkiyə Voleybol Federasiyasının məşqçilik kurslarında təlimçi kimi fəaliyyət göstərib, Mini Voleybol və Qadın Milli Komandaları Texniki Qurumunun üzvü olub.