“Meydandan çıxmasaydılar, bəlkə texniki məğlubiyyət ancaq bizə verilərdi” - “Kür-Araz”ın prezidenti də qərardan narazıdı
Mayın 17-də 2-ci liqanın son turu çərçivəsində İmişlidə keçirilən “Kür-Araz” - “Araz Saatlı” oyununda yaşananların əks-sədası davam edir. İntizam Komitəsi cəzaları açıqladı, hər iki komandaya texniki məğlubiyyət verdi. Müxtəlif qayda pozuntularına görə “Kür-Araz”a ümumilikdə 2200, “Araz Saatlı”ya isə 3770 manat cərimə kəsilib. Kasıb 2-ci liqa təmsilçisi üçün bunlar yetərincə böyük məbləğdi.
“Kür-Araz” təhlükəsizliyi təmin etmədiyinə, “Araz Saatlı” isə matç bitməmiş meydanı özbaşına tərk etdiyinə görə texniki məğlubiyyət alıb. Bəs cəzalı klublar bu qərarı necə qarşıladı? Əvvəlcə “Kür-Araz”ın prezidenti Mirheydər Səfiyevlə danışdıq:
“Qərara etiraz etməyin əhəmiyyəti yoxdu. Qanuna əsasən cəza veriblər. Qələbə qazandığımız halda 90+1-ci dəqiqədə niyə dava salaq ki?! Rəqib futbolçular cığallıq etdilər. İki oyunçuları bunu etdi. Bir futbolçunu, sonra başqasını yıxırlar. Əsəblər gərginləşir. İntizam Komitəsi bizi təhlükəsizliyi təmin etməməkdə günahlandırır. Bizim vəzifəmiz polis dəvət etməkdi. Maksimum sayda polis olub. Başqa nə edə bilərdik ki?! Qərar ədalətli deyil, çünki dava salmaqda marağımız yoxdu”.
Mirheydər bəy “Araz Saatlı”nın prezidenti Ədalət Abdullayevin “Kür-Araz”ı təxribatameyilli komanda adlandırmasına da münasibət bildirdi:
“Qəti doğru deyil. Burda məntiq yoxdu. 3:0 uduruqsa, niyə təxribat edək? Uduzsaq, bəlkə ola bilər. Uduzurdular deyə, qəbul etmirdilər. Meydandan çıxmasaydılar, bəlkə texniki məğlubiyyət ancaq bizə verilərdi. Əsəbdən doğru qərar verə bilmədilər. Meydandan çıxdılar deyə, onlara da texniki məğlubiyyət verildi. Qayıtsaydılar, onlar 3 xal qazanardı”.
Səfiyev meydana hansı komandanın azarkeşlərinin daxil olması ilə bağlı suala belə cavab verdi: “Bizdən də azarkeşlər var idi. Buna görə gələn mövsüm ilk 5 ev oyunun azarkeşsiz keçirəcəyik. Meydana çıxanlar 3 nömrəli futbolçumuz Eltun Həsənlinin atası ilə qardaşı idi. Bizim rəhbərlikdən də sakitləşdirmək üçün meydana düşənlər var idi”.
“Araz Saatlı”nın rəhbəri Ədalət Abdullayev də İntizam Komitəsinin qərarı ilə bağlı “Futbol+”ə danışdı:
“Biz də bunu deyirdik ki, təhlükəsizlik təmin olunmamışdı. Futbolçularımız da buna görə meydandan çıxıb. Təzad var. Rəqib buna görə cəza alıb, biz də meydandan çıxmışıq. Bəs bizə niyə cəza – texniki məğlubiyyət verilir? Apellyasiya Arbitraj Tribunalına müraciət edəcəyik”.
MÜZƏFFƏR QULUZADƏ
Digər xəbərlər
