Rasmus Höylunnun gələcəyi ilə bağlı sual aradan qalxıb. O, Neapolu tərk etməyəcək.

"Football-plus.az" xəbər verir ki, “Napoli” Çempionlar Liqasına (ÇL) vəsiqə qazanandan sonra Höylunnun transfer hüquqlarına sahib olacaq. İtaliya klubu “Piza” üzərində 3:0 hesablı qələbə ilə bu avrokuboka vəsiqəni rəsmiləşdirib. Həmin oyunda Rasmus 1 qol və 1 məhsuldar ötürmə ilə komandasının qələbəsində mühüm rol oynayıb.

“The Athletic”in məlumatına görə, danimarkalı hücumçunun transferi “Mançester Yunayted”ə 44 milyon avro qazandıracaq. Futbolçunun müqaviləsində nəzərdə tutulan bəndə əsasən, “Napoli” ÇL-ə vəsiqəni təmin edəcəyi halda satınalma maddəsi avtomatik qüvvəyə minməli idi.

23 yaşlı forvard cari mövsüm “Napoli”də uğurlu çıxışı ilə seçilir. Uzun müddət zədəli olan Romelu Lukakunu əvəzləyən Höylunn bütün turnirlərdə keçirdiyi 43 oyunda 15 qol vurub və 8 məhsuldar ötürmə verib.