Robert Levandovskinin ötən həftə “Barselona”dan gedəcəyini elan etməsi bir çox tanınan hücumçunun adının Kataloniya klubu ilə yanaşı çəkilməsinə səbəb olub.

"Football-plus.az" xəbər verir ki, bunlardan biri də “Şaxtyor”un braziliyalı hücumçusu Kauan Eliasdı. Donetsk klubu 20 yaşlı hücumçunu təxminən 40 milyon avro dəyərində qiymətləndirir. Futbolçunu “Barselona”, “Qalatasaray”, eləcə də transferin mümkünlüyünü nəzərdən keçirən bir neçə digər Avropa klubu yaxından izləyir.

Maraqlıdı ki, “Bavariya”nın hücumçusu Harri Keyn də karyerasını La Liqada davam etdirə bilər. 32 yaşlı forvardın “Barselona” variantında maraqlı olduğu və xidmətini Kataloniya klubuna təklif etdiyi iddia olunur. “Barsa” ingiltərəli hücumçunu Levandovskinin gedişindən sonra hücum xəttini gücləndirmək üçün variantlardan biri kimi nəzərdən keçirir.

Keynin “Bavariya” ilə müqaviləsində 65 milyon avroluq sərbəstqalma bəndi var və müqaviləsi 2027-ci ilin iyununa qədərdi. “Barselona”nın ona 2029-cu ilin yayına qədər müqavilə təklif etməyə hazır olduğu bildirilir. İngilis futbolçu bundesliqanın son turunda het-trik edib və mövsümü 36 qolla başa vurub.

“Barsa”nın Markus Reşfordun transfer hüququnu birdəfəlik alıb-almayacağı da hələ dəqiqləşməyib. Kataloniya klubunda ingiltərəli hücumçunun çıxışından razıdılar. Lakin rəhbərlik futbolçunun transferi üçün nəzərdə tutulan 30 milyon avroluq məbləğlə bağlı hələ də tərəddüd edir. Məhz bu məbləğ “Barselona” ilə “Mançester Yunayted” arasında bağlanan icarə müqaviləsində satınalma şərti kimi yer alıb.

Reşford “Barsa”da qalmaq üçün maaşının 40 faiz azaldılmasına da razıdı. 28 yaşlı futbolçu cari mövsümdə bütün turnirlərdə 48 oyunda iştirak edib, 14 qol vurub və 14 məhsuldar ötürmə verib.