Mayın 7-də Konfrans Liqasında (KL) yarımfinal arxada qaldı. Təəssüf ki, bu mərhələdə ciddi rəqabət yaşanmadı. İlk oyunlarda qələbə qazanan “Kristal Pelas” və “Rayo Valyekano” cavab görüşlərini də qalib başa vuraraq finala çıxdılar.

“Şaxtyor” məlum səbəbdən Polşanın Krakov şəhərində keçirilən ev oyununda turnirin favoriti sayılan “Kristal Pelas”a 1:3 hesabıyla uduzmuşdu. Arda Turan komandasının finala çıxmaq üçün əlindən gələni edəcəyini bildirmişdi. Ukrayna klubu İngiltərədəki cavab oyununda bunun üçün çox çalışsa da, yenə məğlub oldu. İlk hissədə tərəflər qapıya hərəyə bir dəfə yol tapdılar. Fasilədən az sonra isə yenidən səhnəyə Sarr çıxdı. İlk matçın 21-ci saniyəsində qapıya yol tapan seneqallı yarımmüdafiəçi KL-in tarixinə ən erkən qolun müəllifi kimi düşmüşdü. O, bu dəfə komandasına qələbə qazandırmaqla turnirdəki 9-cu qolunu vurdu və bombardirlərin siyahısında vahid liderliyi ələ aldı. Rəqibini 2:1 hesabıyla məğlub edən Oliver Qlasnerin komandası ilk dəfə avrokubokun finalina vəsiqə qazandı. “Kristal Pelas” “Vest Hem” (1965) və “Nyukasl”dan (1969) sonra İngiltərənin debütdəcə qitə kubokunun həlledici mərhələsinə qədər irəliləyən üçüncü klubu oldu.

Mayın 27-də Almaniyanın Leyptsiq şəhərində keçiriləcək finalda “Rayo Valyekano” da kubok uğrunda mübarizə aparacaq. Tarixində ilk dəfə qitə kubokunun yarımfinalına çıxan İspaniya klubu KL-in liqa mərhələsini 1-ci yerdə başa vuran “Strasbur”u evdə olduğu kimi, Fransada da minimal hesabla məğlub etdi. Bu dəfə də yeganə qolu Alemao vurdu. Maraq üçün “Rayo Valyekano”nun qitə arenasında ikinci mövsümünü keçirdiyini, ilk dəfə 2000/01 mövsümündə UEFA Kubokunda iştirak etdiyini və 1/4 finala qədər irəlilədiyini də xatırladaq.

Bu fakt da vurğulanmalıdı. “Rayo Valyekano”nun qələbəsi İspaniyaya Çempionlar Liqasında (ÇL) əlavə yer qazandırdı. Avrokubokların cari mövsümündə İngiltərədən (28,125) sonra ən çox əmsal (22,093) yığan La Liqa ÇL-in 2026/27 mövsümündə 5 komanda ilə təmsil olunacaq.

yarımfinal, cavab oyunları
Kristal Pelas (İngiltərə) - Şaxtyor (Ukrayna) 2:1 (ilk oyun - 3:1)
Pedro Enrike, 25-öz qapısına. Sarr, 52 - Eqinaldo, 34.
Kristal Pelas: Henderson, Kanvo, Lakrua, Riçards, Mitçell, Kamada (Lerma, 88), Uorton (Hyuz, 89), Munyos (Klayn, 89), Pino (Conson, 78), Sarr, Mateta (Strann Larsen, 66).
Şaxtyor: Rıznik, Bondar, Matvienko, Pedro Enrike, Tobias (Qram, 27), Oçeretko (Neverton, 56), M.Qomes, Pedrinyo (Ferreyra, 75), Eqinaldo, Alisson (İsake, 46), Kauan Elias (Traore, 56).
Strasbur (Fransa) - Rayo Valyekano (İspaniya) 0:1 (0:1)
Alemao, 42.
Strasbur: Penders, Çiluell (Nanasi, 46), Dukure, Omobamidele, Due, Əl-Murabet (Amo-Ameyau, 67), Qodo, Uattara, Barko, Moreyra, Enkiso.
Rayo Valyekano: Batalya, Çavarriya, Lejen, Ratsyu, Siss, U.Lopes (Qumbau, 90), Valentin, Palason (Dias, 78), Espino (A.Qarsiya, 85), De Frutos (Balyiu, 78), Alemao (Kamelyo, 65).

Bombardirlər: Sarr (Kristal Pelas) - 9, İshak (Lex), Muandilmanci (Samsunspor) - 8, Meynans (Alkmaar) - 6.