Aprelin son günündə Konfrans Liqasında (KL) yarımfinal mərhələsi başladı. İlk oyunlarda qələbə qazanan “Kristal Pelas” və “Rayo Valyekano” finala çıxmaq şansını artırdı.

Məlum səbəbdən ev oyununu Polşanın Krakov şəhərində keçirən “Şaxtyor”un püşkdə bəxti gətirməyib. Ukrayna klubu turnirin favoriti sayılan “Kristal Pelas”ı mübarizədən kənarlaşdırmağa çalışacaq. Ancaq ilk oyunun nəticəsi Arda Turanın komandasının finala çıxmaq şansının yetərincə azaldığını deməyə əsas verir. İngiltərə klubu ilk hücumdaca hesabı açdı. 21-ci saniyədə qapıya yol tapan Sarr KL-in tarixinə ən erkən qolun müəllifi kimi düşdü! Donetsklilər seneqallı yarımmüdafiəçinin turnirdəki 8-ci qoluna fasilədən az sonra Oçeretko ilə cavab verdilər. Lakin bundan sonra üstünlük böyük ölçüdə ingiltərəlilərin tərəfində oldu. Daha iki qol vuraraq rəqibini 3:1 hesabıyla məğlub edən Oliver Qlasnerin komandası finalın qapısını açmış oldu.

Yarımfinalın İspaniyada baş tutan digər oyunu ev sahibinin qələbəsi ilə nəticələndi. Tarixində ilk dəfə qitə kubokunun yarımfinalına çıxan “Rayo Valyekano” oyun planında üstələdiyi “Strasbur”un qapısına bir qol vura bildi. Bu qolun pireneylilərə final çıxmaq üçün kifayət edib-etməyəcəyini zaman göstərəcək. Xatırladaq ki, 1/4 finalda Almaniyada iki cavabsız qolla uduzan fransalılar öz meydanında “Maynts-05”i 4:0 hesablı qələbə ilə mübarizədən kənarlaşdırmışdılar. “Strasbur”un KL-in liqa mərhələsini 1-ci yerdə başa vurduğunu da yada salaq.

yarımfinal, ilk oyunlar
Şaxtyor (Ukrayna) - Kristal Pelas (İngiltərə) 1:3
Oçeretko, 48 - Sarr, 1. Kamada, 58. Strann-Larsen, 84.
Şaxtyor: Rıznik, Bondar, Matvienko, Pedro Enrike, Tobias, Oçeretko (Nazarina, 83), M.Qomes (İsake, 65), Pedrinyo (Bondarenko, 74), Eqinaldo (Neverton, 74), Alisson, Kauan Elias (Traore, 83).
Kristal Pelas: Henderson, Kanvo, Lakrua, Riçards, Mitçell, Kamada (Lerma, 90), Uorton, Munyos, Pino (Conson, 73), Sarr, Mateta (Strann-Larsen, 65).

Rayo Valyekano (İspaniya) - Strasbur (Fransa) 1:0
Alemao, 53.
Rayo Valyekano: Batalya, Çavarriya, Lejen, Ratsyu, Siss, U.Lopes (Qumbau, 90), Valentin, Palazon (Kamelyo, 88), Ahomaş, De Frutos (Espino, 88), Alemao (Dias, 64).
Strasbur: Penders, Çiluell, Hoysberq, Dukure, Omobamidele, Uattara, Əl-Murabet (Oyedele, 90), Qodo (Amo-Ameyau, 67), Moreyra, Enkiso, Emeqa (Nanasi, 84).

Cavab oyunları mayın 7-də keçiriləcək.

Bombardirlər: İşak (Lex), Muandilmanci (Samsunspor), Sarr (Kristal Pelas) - 8, Meynans (Alkmaar) - 6.