final
Latsio – İnter 0:2 (0:2)
Latsio: Motta, Tavareş, Romanyoli, Xila, Maruşiç (Latsari, 72), Patrik (Rovella, 46), Başiç (Pedro, 78), Teylor, İsaksen (Kançelyeri, 66), Zakkanyi (Dia, 72), Noslin.
İnter: X.Martines, Bastoni (Auqusto, 77), Bissek, Akanci, Dyumfris (Luis Enrike, 68), Dimarko, Barella, Zyelinski, Suçiç (Mxitaryan, 68), M.Türam (Diuf, 82), L.Martines (Bonni, 77).
Qollar: Maruşiç, 14-öz qapısına (0:1). L.Martines, 35 (0:2).
Vərəqələr: Bissek, 6. Bastoni, 16. Xila, 38. Pedro, 85. Dimarko, 85. Barella, 85. Zakkanyi, 87 – sarı.
Hakim: Marko Quida.
13 may. Roma. 68729 tamaşaçı.

Mayın 13-də İtaliya kubokunun 2025/26 mövsümünə yekun vuruldu. Ənənəvi olaraq paytaxt Romadakı “Olimpiko” stadionunda keçirilən finalda favorit sayılan komanda qalib gəldi.

Maraqlıdı ki, “Latsio” mayın 9-da elə bu arenada “İnter”ə 0:3 hesabıyla uduzmuşdu. A seriyasında mövsümün sonuna iki tur qalmış 36 oyuna 51 xalla 9-cu yerdə olan Mauritsio Sarrinin komandasının avrokuboka vəsiqə qazanmaq şansı yalnız ölkə kubokuna sahib olmasından asılı idi. “Qartallar”ın bunu reallaşdırmaq ehtimalı isə minimum hesab edilirdi. Ona görə ki, finişə üç tur qalmış tarixində 21-ci dəfə çempion olan “İnter”in hər baxımdan mövsümü “qızıl dubl” ilə başa vurmaq şansı yüksək idi. Milanlılar favorit statusunu ilk hissədəcə vurduqları iki cavabsız qolla doğrultdular. “Latsio” ardıcıl ikinci mövsüm avrokuboklardan kənarda qaldı. “İnter” isə İtaliya kubokunu 10-cu dəfə qazandı. Milanlılar “Roma”nı (9) arxada qoyaraq turnirdə “Yuventus”dan (15) sonra ən çox qələbə qazanan ikinci komanda oldular. “İnter”in 16 ildən sonra “qızıl dubl” etdiyini də vurğulamalıyıq. Lombardiya əyalətinin təmsilçisi 2009/10 mövsümündə Joze Mourinyonun başçılığı altında A seriyasının və İtaliya kubokunun qalibi olmuşdu. Maraq üçün Apennində sonuncu dəfə “qızıl dubl”a 2017/18 mövsümündə “Yuventus”un nail olduğunu da xatırladaq.

Əlbəttə, Kristian Kivunun uğurlarını da qeyd etməliyik. “İnter”ə ötən yay təyinat alan rumın mütəxəssis debüt mövsümündəcə karyerasında iki titul qazandı. Onun gələn ilin əvvəlində İtaliya Superkubokunda daha bir uğuru reallaşdırmaq şansı olacaq. Maraqlıdı ki, bu turnirdə “İnter”in rəqibi olacaq üç komanda sırasında “Latsio” da çıxış edəcək. Yeri gəlmişkən, çox güman ki, romalıları mini-turnirə Sarri çıxarmayacaq. Onun paytaxt klubunu tərk edəcəyi haqda şayiələr çoxdan dolaşır...