A seriyasında 23-cü tura Romada keçirilən matçla start verildi. 5 qolun qeydə alındığı “Latsio” – “Cenoa” oyununun nəticəsindən çox tamaşaçı amili ilə bağlı fakt diqqəti cəlb etdi.

"Football-plus.az" xəbər verir ki, ev sahiblərinin azarkeşləri rəhbərliyin fəaliyyətinə etiraz əlaməti kimi “Olimpiko” stadionunu, demək olar ki, boş qoydular. Yerli mənbələrin xəbərinə görə, təxminən 30 min futbolsevər “Latsio”nun prezidenti Klaudio Lotitoya qarşı boykota əl atmağı lazım bilib. Belə etiraza səbəb kimi klubun ambisiyasızlığı, transfer siyasətindəki məhdudiyyətlər və Lotitonun iştirakıyla yayılan qalmaqallı səs yazıları göstərilir.

Rəhbərliyin rəsmi bəyanat yayaraq boykot çağırışlarını “qəbuledilməz” adlandırması isə azarkeşləri daha da qəzəbləndirib. Bunu hüquqlarının tapdanması kimi dəyərləndirən fanatlar cümə günü 70 min yerlik stadionda yalnız 5 mindən bir qədər çox tərəfdarın görünməsinə şərait yaradıblar. Onlar nəhəng arenanı tərk etməzdən əvvəl “Xəyalsız, bizə, sadəcə, sağ qalmaq lazım deyil” yazılan banner açıblar. Azarkeş dəstəyindən böyük ölçüdə məhrum olan “Latsio”nun son saniyələrdə penalti qolu ilə 3:2 hesablı qələbə qazanması, yəqin ki, rəhbərliyə daha çox lazım idi. Görəsən, bu nəticə klubun başbilənlərinə münasibəti nə dərəcədə dəyişəcək və ya dəyişə bilərmi?..

Şənbə və bazar günü, təbii ki, əsas diqqət çempionluğa iddialıların iştirakı ilə keçirilən oyunlara yönəlmişdi. “İnter”in Kremona səfərinndə maksimum xal alacağı gözlənilirdi. Liderin 2:0 hesablı qələbəsinin əsasını qoyan Lautaro Martines A seriyasında 128-ci qolunu vurdu. Argentinalı hücumçu Milan klubunun bombardirlərinin siyahısında 4-cü olan Alessandro Altobelliyə çatdı. İlk hissədə Zyelinskinin fərqi iki topa çatdırması milanlıların fasilədən sonra nisbətən rahat oynamasına şərait yarada bilərdi. Kremonalılar güclü rəqibə qarşı cəsarətli oyun sərgiləsələr də, layiq olduqları bir qolun belə sevincini yaşaya bilmədilər. Çempionatdakı məğlubiyyətsiz seriyası 11 oyuna (10 qələbə, 1 heç-heçə) çatan Kristian Kivunun komandası inamlı qələbə ilə mövqeyini möhkəmlətdi.

Bu mövsüm bir qədər qeyri-sabit çıxış edən “Napoli” də azarkeşlərini sevindirdi. Son çempion evdə “Fiorentina”ya 2:1 hesabıyla qalib gələrək 3-cü yerdə qaldı. Kapitanı Di Lorentsonu zədə səbəbindən itirən Antonio Kontenin komandası liderdən yenə 9 xal geridədi.

Parmada eyniadlı rəqibi 4:1 hesabıyla məğlub edən “Yuventus” isə “Roma”nın oyununun bazar ertəsinə təyin olunmasından yararlanaraq azı bir günlüyə 4-cü yerə yüksəldi. İtaliyanı Çempionlar Liqasında təmsil edən “Atalanta” isə Komo səfərində böyük əzmkarlıq göstərdi. Berqamolular 8-ci dəqiqədə Ahanorun qırmızı vərəqə almasına görə azlıqda qalsalar da, evə xalla qayıtmağı bacardılar. Bunda son dəqiqədə Pasın penalti zərbəsini dəf edən qapıçı Karnesekki də rol oynadı.

23-cü tur
Latsio – Cenoa 3:2
Pedro, 56-p. Teylor, 62. Kataldi, 90+10-p. – Malinovski, 67-p. Vitinya, 75. (5402)
Latsio: Provedel, Maruşiç, Xila, Provstqor, Luka Pelleqrini (Tavareş, 82), Başiç, Kataldi, Teylor (Dele Başiru, 81), İsaksen (Noslin, 88), Maldini (Ratkov, 73), Pedro (Kançelyeri, 73).

Napoli – Fiorentina 2:1
Verqara, 11. Qutyerres, 49 – Solomon, 57. (40000)
Napoli: Milinkoviç-Saviç, Juan Jezus, Buoncorno, Qutyerres, Di Lorentso (Olivera, 30), Spinatsola, Lobotka, Verqara (Jiovane, 84), Maktominey, Elmas, Höylunn (Lukaku, 90+1).
Fiorentina: De Xea, Ponqraçiç, Komutso, Dodo, Qosens (Ranyeri, 70), Breşianini (Parizi, 70), Fabbian (Mandraqora, 46), Facoli, Qudmundsson (Fatsini, 79), Solomon (Ken, 70), Pikkoli.

Komo – Atalanta 0:0
(11925)
Atalanta: Karnesekki, Skalvini, Cimşiti, Ahanor, De Roon, Ederson, Zalevski (Bellanova, 46/Kossunu, 86), Zappakosta, Bernaskoni, De Ketelare (Krstoviç, 60), Skamakka (Sulemana, 18).

Kremoneze – İnter 0:2
L.Martines, 16. Zyelinski, 31. (14828)
İnter: Zommer, Bissek, Akanci, Bastoni, Zyelinski, Dimarko, Suçiç (Diuf, 82), Luis Enrike (Mxitaryan, 60), Frattezi (Darmian, 60), L.Martines (Bonni, 74), F.Espozito (M.Türam, 60).

Parma – Yuventus 1:4
Kambyazo, 51-öz qapısına - Bremer, 15; 54. Makkenni, 37. Devid, 64. (22027)
Yuventus: Di Qreqorio, Kelli, Bremer (Qatti, 66), Kalulu, Kambyazo, K.Türam, Lokatelli, Makkenni (Kabal, 74), Konseysao (Kostiç, 65), Yıldız (Miretti, 46), Devid (Openda, 81).

Piza – Sassuolo 1:3
Ebişer, 51 – Berardi, 25. Karaççolo, 51-öz qapısına. İ.Kone, 58. (10185)

Kalyari – Verona 4:0
Matsitelli, 36. Kılıçsoy, 45+2. Sulemana, 84. İdrissi, 90+1. (15791)

Torino – Leççe 1:0
Adams, 29. (6000)

Udineze – Roma 1:0
Ekkelenkamp, 49.

1. İnter 23 18 1 4 52-19 55
2. Milan 22 13 8 1 35-17 47
3. Napoli 23 14 4 5 33-21 46
4. Yuventus 23 13 6 4 39-18 45
5. Roma 23 14 1 8 27-14 43
6. Komo 23 11 8 4 37-16 41
7. Atalanta 23 9 9 5 30-20 36
8. Latsio 23 8 8 7 24-21 32
9. Udineze 23 9 5 9 26-34 32
10. Bolonya 22 8 6 8 32-27 30
11. Sassuolo 23 8 5 10 27-29 29
12. Kalyari 23 7 7 9 28-31 28
13. Torino 23 7 5 11 22-40 26
14. Cenoa 23 5 8 10 27-34 23
15. Kremoneze 23 5 8 10 20-31 23
16. Parma 23 5 8 10 15-30 23
17. Leççe 23 4 6 13 13-30 18
18. Fiorentina 23 3 8 12 25-36 17
19. Piza 23 1 11 11 19-40 14
20. Verona 23 2 8 13 18-41 14

Bombardirlər: L.Martines (İnter) - 13, Duvikas, Pas (hər ikisi “Komo”), Pulişiç (Milan), Yıldız (Yuventus) - 8.

Növbəti turun oyunları fevralın 6-9-u aralığında keçiriləcək: Verona - Piza, Cenoa – Napoli, Fiorentina - Torino, Bolonya – Parma, Leççe - Udineze, Sassuolo - İnter, Yuventus - Latsio, Atalanta – Kremoneze, Roma – Kalyari, Milan - Komo.