Startı yanvarın 18-də verilən İtaliya Superkubokunda növbəti gün ikinci yarımfinal oyunu keçirildi. Bu dəfə də komandalardan birinin böyükhesablı qələbəsi qeydə alındı.

"Football-plus.az" xəbər verir ki, bu ildən Superkubokun formatında dəyişiklik edilib. İtaliya çempionu ilə ölkə kubokunun son qalibi arasında keçirilən bir oyundan ibarət mübarizənin əvəzinə 4 komandanın iştirakı ilə mini-turnirin təşkilinə qərar verilib. Turnirə yenə Səudiyyə Ərəbistanı evsahibliyi edir. Reqlamentə əsasən, yarımfinal oyunlarında A seriyasının son çempionu “Napoli” ilə ölkə kubokunun finalçısı “Fiorentina”, vitse-çempion “Latsio” isə kubokun sahibi “İnter” ilə qarşılaşdı.

Bu mərhələnin ikinci oyunu da paytaxt Ər-Riyaddakı “Əl-Əvval Park” stadionunda keçirildi. Xatırladaq ki, “Latsio” bu mövsüm A seriyasında “İnter”ə uduzmuşdu: ötən il dekabrın 17-də Romada baş tutan oyunda Lautaro Martines ilə Türamın vurduğu qollar milanllara 2:0 hesablı qələbə qazandırmışdı. Mauritsio Sarrinin çalışdırdığı paytaxt komandası bu rəqibi ilə yenə bacara bilmədi. Superkubok matçının böyük hissəsi “İnter”in diqtəsi ilə keçdi. 17-ci dəqiqədə Türam Dimarkonun dabanı ilə ötürməsindən sonra hesabı açdı. Milanlılar bununla kifayətləməyib hücumları davam etdirdilər. Lakin ilk hissədə hesabdakı üsünlüyünü artıra bilmədilər. “Latsio”nun fasiləyə qədər təşkil etdiyi hücumlar bir əlin barmaq sayına bərabər idi. Romalıların oyun ərzində rəqib qapısına bir dəqiq zərbə belə endirə bilmədiklərini xüsusi vurğulayaq. İkinci hissənin əvvəlində Martinesin qazandığı penaltini Çalhanoğlu dəqiq yerinə yetirdi. Bundan sonra paytaxt komandası fəallaşsa da, qapıya endirilən az sayda zərbələrin heç biri hədəfə düşmədi. Oyunda son nöqtəni isə meydana 66-cı dəqiqədə daxil olan Frattezi qoydu. O, Simone İnzaqinin komandasının inamlı qələbəsini təmin etdi.
Beləliklə, ölkə kubokunun sahibi statusunu doğrultdi. “İnter” 12-ci dəfə Superkubokun finalına vəsiqə qazanmaqla əzəli rəqibi “Milan”a çatdı. Bu planda rekordun “Yuventus”a (17 dəfə) məxsus olduğunu da bildirək.

yarımfinal
İnter - Latsio 3:0
Türam, 17. Çalhanoğlu, 49-p. Frattezi, 87.
İnter: Zommer, A.Bastoni (De Vrey, 66), Açerbi, Pavar, Darmian, Dimarko, Barella (Frattezi, 66), Mxitaryan, Çalhanoğlu (Asllani, 81), Türam (Sançes, 73), Lautaro Martines (Arnautoviç, 73).
Latsio: Provedel, Latsari (Hüsay, 83), Qila, Romanyoli, Maruşiç (Luka Pelleqrini, 66), Vesino, Rovella (Kataldi, 51), Genduzi (Luis Alberto, 51), Felipe Anderson, İmmobile, Pedro (İsaksen, 66).

Bu mərhələnin digər oyununun nəticəsi: Napoli – Fiorentina 3:0
(Simeone, 22. Zerbin, 84; 86).
final
Napoli – İnter ?:?
????????????????

Oyundan sonra
Simone İnzaqi, “İnter”in baş məşqçisi: “İlk dəqiqələrdən oyuna düzgün münasibət göstərdik və matçı əla keçirdik. Birinci hissəni yalnız bir top fərqi ilə öndə başa vurmağımızda razı qalmadım. Ona görə ki, kifayət qədər qol vəziyyəti yaratdıq. Amma sonda 3:0 hesabı ilə qalib gəldik. Hələ iki dəfə qapı çərçivəsini nişan aldıq. Odu ki, ümumilikdə nəticədən razıyam. Finalda “Napoli”yə qarşı oynayacağıq. Çox çətin oyun olacaq. İki günə bərpa olunmalıyıq”.