“Son turdan öncə əslində üzərimizdə təzyiq hiss edirdik. Derbidəki qələbədən sonra 1:4 uduzduq. Elə son matçda da 1:2 uduzurduq. Yəni əslində təhlükəli bir durum idi. Amma vəziyyəti xeyrimizə dəyişə bildik. Bizim üçün unudulmaz bir gecə oldu. Türkiyədə 2-ci çempionluğumu, 3-cü titulumu qazandım. Fanatlarımıza 2000-ci ildən bəri ilk dəfə ardıcıl 4 çempionluq yaşatdıq. Final fitindən sonrakı atmosfer, sadəcə, möhtəşəm idi. Bu atmosferi dünyanın heç yerində görməmişdim. İnsanlar meydana axın etdilər. O gündən bəri indiyə qədər də qələbəni qeyd edirlər. Rəsmi çempionluq tədbiri hələ baş tutmayıb. Üstüaçıq avtobusla şəhərdə fanatlarımızla yola çıxacağıq və stadiona yollanacağıq. Yığmada oynamaqla uşaqlıq arzuma çatdım. Fransaya qarşı yoxlama matçında debüt etdim. Uduzduğumuz üçün oyundan sonra çox əsəbləşdim. Amma sonra oteldə hirsim soyudu və nələr olduğunu anlamağa başladım. Şəkillərimi və videolarımı görəndən sonra “aman tanrım, mən həqiqətən də yığmada oynadım”, - deyə düşündüm. Braziliya yığmasına dəvət almaq ritualı bir futbolçunun yaşayacağı ən gərgin anlardan biridi. Orda insanları məmnun etmək çox çətin, amma eyni zamanda əyləncəlidi. Məğlubiyyətə nifrət etdiyimdən, adətən, uduzduğumuz oyunlardan sonra özümə qapanıram. Fransa ilə matçda cəmi 10 dəqiqə oynasam da, sonradan “nəyi daha yaxşı edə bilərdim”, - deyə düşünməyə başladım. Ançelotti ilə oyundan sonra söhbət etdik. Mənim oyuna necə daxil olduğumu bəyəndiyini söylədi. Ciddi itkilərimiz var idi. Fransa isə tam heyətlə oynadı. Xorvatiyaya qarşı sonrakı matçda daha yaxşı təsir bağışladıq. Mən hər şeydən öncə Braziliya yığmasının heyranıyam. Bu formanı qürurla geyirəm. Dəfələrlə yığmanın formasında məşqlərə çıxmışam və səyahətlərə yollanmışam. Hətta bu gün də yığmanın oyununu izləyə bilmək üçün gecəyarısı oyanıram. DÇ-yə yollanacaq heyətdə olmağı çox istərdim. Bu mövzu böyük gözlənti və həyəcan yaradır. Həyəcanı boğmaq üçün bu haqda düşünməməyə, sadəcə, hər gün həyatımı yaşamağa çalışıram. DÇ-də oynamaq hər futbolçunun arzusudu. Mənim isə uşaqlıq arzumdu. Bütün mövsüm bu arzunu düşünərək üzərimdə çalışdım. Baş məşqçi kimi layiq bilirsə, onu da çağıracaq. Heyətdə olsam, təbii ki, əlimdən gələni edəcəm. Heyətdə olmasam, həmişəki kimi Braziliyanı kənardan dəstəkləyəcəm. Karyeramboyu bir çox fərqli mövqedə oynamışam. Fikrimcə, peşəkar olandan bəri yalnız qapıçı, mərkəz müdafiəçisi və mərkəz hücumçusu mövqeyində oynamamışam. Həmişə komandama yardım etməyə çalışıram. Cinah müdafiəçisi kimi məndən müdafiə olunmaq tələb olunursa, oyunboyu müdafiə olunuram. Fikrimcə, bu universallığım yığma komandaya da faydalı ola bilər. “6”, “8”, “10” nömrə mövqelərində və cinahlarda rahatlıqla oynaya bilirəm. Düşünürəm ki, karyeramın ən yaxşı və parlaq dönəmindəyəm. Bu mövsüm həm Çempionlar Liqasında, həm yığmada qarşılaşdığım rəqabət səviyyəsi belə düşünməyə əsas verir. Dünyanın ən yaxşı klublarına və oyunçularına qarşı oynamışam. “Atletiko” və “Liverpul”a, yığmada isə Fransaya qarşı oynadım. Xoşbəxt olsam da, tam məmnun olduğumu deməzdim. Bədənimdə hələ çox “yanacaq” var. Daha da “artırmağa” qadirəm. Əsl hədəfim DÇ-di. Orda oynasam, artıq tam məmnun olacam”.