“Formula-1” üzrə dünya çempionatının yeni mövsümündə hələ cəmi 4 mərhələ arxada qalıb.

Mövsüm Corc Rassellin qələbəsi ilə başlasa da, növbəti üç mərhələdə “Mersedes”in pilotu Kimi Antonelli finiş xəttini birinci keçdi. Mayami mərhələsindən sonra jurnalistlər önünə çıxan 19 yaşlı italiyalı jurnalistlərin bəzi suallarını cavablayıb.

- Qələbə ilə bağlı təbrikləri qəbul edin! Bu mərhələ əvvəlki ikisindən onunla fərqləndi ki, bütün məsafə boyunca güclü pressinqə məruz qaldız. Çıxışınızdan nə dərəcədə razısız?
- Bəli, xüsusi yarış idi, yaxşı keçdi. Sadə yarış adlandıra bilmərəm, ona görə ki, məsafə boyunca çox şey yaşandı. Heç də yaxşı başlamadım, bununla bağlı deyilənlərlə razıyam, üstəlik səhvə də yol verdim, ancaq sonradan bəxtim gətirdi, hadisələr arzuolunan axar üzrə inkişaf etdi. Əlbəttə, Şarl Lekler və Lando Norrislə rəqabət apardım. Enerjidən istifadə zamanı səhvə yol verdiyimə görə Lando məni ötdü, belədə izləyici roluna düşdüm. Xoşbəxtlikdən erkən pit-stop taktikası əla işlədi, bundan sonra artıq onlar məni izləməyə başladı. İşim asan olmadı, xüsusən də Lando sürətli gəlirdi, mənə fəal şəkildə pressinq tətbiq edirdi. Və onda anladım ki, artıq səhv etmək hüququm yoxdu.

- Son dünya çempionunun təzyiqinin öhdəsindən necə gəldiyiniz haqda ətraflı danışın...
- Bəli, vəziyyət çox mürəkkəb idi, axı Norrisin dəfələrlə ötmə rejimindən yararlanmaq imkanı oldu, onun nə dərəcədə effektli olduğunu bilirik. Yalnız doğru hərəkət etməli olduğumu anlayırdım. Mürəkkəb yarış şəraiti də işimi çətinləşdirirdi. Ona görə ki, yağış asfaltın üzərindən işlənmiş rezin qatını yumuşdu, yer çox sürüşkən idi. Bir sözlə, finişə birinci yerdə çatdığıma görə çox razıyam. Komandaya gözəl işə görə minnətdarlıq etməliyəm. Həmçinin ailəmə “sağ ol” demək istəyirəm, həftəsonu burda oldular.

- Radiorabitə zamanı komandaya sürətlər qutusu ilə bağlı hansısa problemin olduğunu xəbər verdiz.
- Əslində bu məqam maşının davranışına təsir göstərmədi. İki və ya üç mərhələdə sürət rejimini dəyişməklə bağlı problem oldu, bir neçə dəfə 7-ci rejimdən səkkizinciyə keçə bilmədim. Bir qədər əsəbləşdim. Ancaq xoşbəxtlikdən bu problem qısa sürdü, sonradan hər şey qaydasına düşdü. Əlbəttə, bu problem məni bir qədər həyəcanlandırdı. Axı arxadan çox sıx şəkildə məni izləyirdilər.

- Şəxsi hesabda üstünlüyünüz artıq 20 xala çatıb (Antonellinin 100, Corc Rassellin 80 xalı var – red.). Çempionatın bu mərhələsində lider olacağınızı gözləyirdizmi? Bu mövsüm çempionluq şansınızı nə dərəcədə nikbin dəyərləndirirsiz?
- Yox, belə üstünlük yaradacağımı gözləmirdim. Ancaq mövsümün sonuna hələ çox var, çox şey dəyişə bilər. Sözsüz, Corc Kanadada çox uğurlu çıxış etməlidi, o, orda həmişə yüksək nəticə göstərir. Güman edirəm ki, bu maşınımızın sükanı arxasında mənə də çox rahatdı, vəziyyətə get-gedə daha yaxşı nəzarət edirəm, odu ki, biz də Kanadada maksimum gücümüzü ortaya qoyacağıq. Ən yaxşı nəticəyə ümid edirəm.