Bu gün ölkə kubokunun son matçına şahidlik edəcəyik. Nominal meydan sahibi olan “Sabah” premyer-liqada təkcə çempion yox, həm də ən çox qol vuran, “Turan Tovuz”la birgə ən az qol buraxan komandadı. Yəni Masazır təmsilçisi bura qədər həqiqətən də baxımlı futbol göstərməklə, döyüşkənliyi və əzmkarlığı sayəsində gəlib. “Zirə”nin durumu isə bir qədər fərqlidi. “Qartallar”ın uğuruna kölgə salmaq niyyətimiz yoxdu, ancaq Əliyar Ağayevin məlum səhvləri olmasaydı, “bayquşlar”ın rəqibi kimi “Turan Tovuz”u da görə bilərdik. Hər halda, oyunun afişası “Sabah” – “Zirə” kimi yazılıb.

Çoxu təsdiq edər ki, “bayquşlar”la bağlı narahatedici məqam yoxdu. Komanda onsuz da Çempionlar Liqasında çıxış edəcək. Hazırda kollektivin yeganə motivasiyası tarixində ilk dəfə “qızıl dubl”a imza atmaq fürsətidi. “Zirə” isə avrokuboklardan kənarda qalmaq təhlükəsiylə üz-üzədi. Reallıq odu ki, premyer-liqada 5-ci sıraya enən “qartallar”ın 4-cü pillədəki “Neftçi”ni qabaqlamaq şansı azdı. Çünki “ağ-qaralar” 32-ci turda “Sabah”a uduzsa belə, sonuncu turda “Kəpəz”ə qalib gəlməklə mövsümü 4-cü yerdə bitirəcək. Odu ki, “Palms Sports Arena”da keçiriləcək final matçı Rəşad Sadıqov üçün həyati əhəmiyyət daşıyır. Artıq “qartallar” avrokuboklara vəsiqə qazanmasa, baş məşqçiylə yolların ayrılacağı haqda xəbərlər yayılıb. Belədə mütəxəssisin bu matçda mütləq qələbə qazanmalı olduğu aşkardı.

Ümumiyyətlə, bir neçə həftə əvvəl “avrokuboklar uğrunda mübarizə aparan yeganə yerli məşqçi mənəm” deyib sinəsinə döyən Rəşad bəy iddiasına sadiq qalmalı, tutduğu posta layiq olduğunu sübut etməlidi. Yoxsa “Omoniya”nın “sükanı arxasında” olarkən, daha dəqiqi, 2024-cü ildə “Zirə”ni 6:0 hesabıyla məğlub etsə də, Rəşad Sadıqovun istefasına müvəffəq ola bilməyən Valdas Dambrauskas bu dəfə istəyinə çatacaq!

KƏNAN BAHADIR