Urfan Abbasov premyer-liqada 350-ci oyununu keçirib.

"Football-plus.az" xəbər verir ki, “Araz-Naxçıvan”ın kapitanının yubileyi “Sumqayıt”la səfər matçına (1:2) təsadüf edib. O, Misli premyer-liqasının 31-ci turunun görüşünə start heyətində çıxıb.

Abbasov 350 oyunda 8 qola imza atıb. Debütü 2011/12 mövsümünə təsadüf edən futbolçu üç klubun formasını geyib. O, “Qəbələ”də 248 (5 qol), “Səbail”də 47 (2 qol) və “Araz-Naxçıvan”da 55 (1 qol) oyun keçirib.

Urfan ölkə çempionatları tarixinə yüksək dəstədə 350 və daha çox oyun keçirən 14-cü futbolçu kimi düşüb. O, 2025/26 mövsümündə adı sifariş vərəqində olmuş oyunçular arasında 3-cü göstəriciyə malikdi. “Qəbələ”nin futbolçusu Asif Məmmədov 388, karyerasını mövsümün gedişində “Araz-Naxçıvan”da bitirən Qara Qarayev 360 matçın iştirakçısı olub.