Müqavilə ilə ''Beşiktaş''a məxsus olan və icarə əsasında ''Kalyari''də çıxış edən Semih Kılıçsoy İtaliyada yenə gözdən düşməyə başlayıb.

"Football-plus.az" xəbər verir ki, İtaliya mətbuatında türkiyəli futbolçunun durumuna aid analiz yazısı dərc olunub. ''Tuttomercatoweb''də yerləşdirilən yazıda qeyd olunub ki, bu gedişlə 21 yaşlı futbolçunun İtaliyada qalmaq şansı qalmayacaq.

Semihin İtaliyaya adaptasiyası çətin keçdi. Mövsümün ortasında onda kiçik bir qığılcım yarandı. ''Beşiktaş''ın yetirməsi 16-23-cü turlarda 4 qol vurdu. Amma sonradan barıtı tükənməyə başladı. Son həftələrdə Kılıçsoy start heyətinə həsrət qalmaq bir yana, hətta rotasiyada da şans qazanmır. Məsələn, son 3 turun hamısını bu futbolçu ehtiyatda keçirib və sonradan da meydana çıxmayıb. Baş məşqçi Fabio Pizakane son açıqlamalarının birində ''onun fiziki durumu hazırda məni qane etmir'' deyərək Semihdən narazılığı gizlətməmişdi. Kılıçsoyun özünü göstərə bilməsi üçün vaxtı azalır. Əks halda o, yayda ''Beşiktaş''a qayıtmalı olacaq. Bu gedişlə ''Kalyari''nin 12 milyon avro ödəyərək Semihi daimi əsasda transfer edəcəyi inandırıcı görsənmir.

Bir ara Türkiyə mətbuatında ''Kalyari''nin təzminatı aşağı salmaq üçün ''Beşiktaş''a müraciət etməsi haqda xəbərlər peyda olmuşdu. Amma İstanbul nəhəngi birmənalı şəkildə bu təklifi geri çevirərək danışıqlara başlamağa ehtiyac görmədi. Onlar qarşı tərəfə ''ya pulu verin, ya da Semihi geri göndərin'' dedilər. İddialara inansaq, ''qartal'' gənc oyunçunun geri dönməsinin əleyhinə deyil. Sərgən Yalçının gələn mövsüm ona şans verə biləcəyi güman edilir.

Semih Kılıçsoy bu mövsüm ''Kalyari''də 25 rəsmi oyunda 1089 dəqiqə meydanda olub və 4 qol vurub.