Misli premyer-liqasının 29-cu turunda “Zirə” səfərdə “Turan Tovuz”la heç-heçə etdi – 1:1.

“Football-plus.az” xəbər verir ki, oyunsonrası mətbuat konfransında qonaqların çalışdırıcısı Rəşad Sadıqov media önünə çıxıb.

- Oyun bizim üçün yaxşı başladı. Qol vəziyyəti yaxaladıq, alınmadı. Təkbətək epizod qaçdı, sonra qol vurduq, sayılmadı. 15-30-cu dəqiqələr arasında rəqib təşəbbüsü ələ aldı. Standart vəziyyətlərdən biri qolla nəticələndi. Miller, Joarlem kimi futbolçuları oynamasa da, qol vura bildilər. Fasilədən sonra komandam yaxşı çıxış etdi. Hücumda daha fəal idik. Hesabı bərabərləşdirdik, yaxşı hücumlar etdik. “Turan Tovuz” səfərində hesabda geri düşüb, 1 xal qazanmaq yaxşı nəticədi.

- Hakim qərarları da nəticələrdə rol oynayır. Bugünkü oyuna Rəvan Həmzəzadənin təyinatını necə qarşıladız?
- O, çempionatın yaxşı və təcrübəli hakimlərindəndi. Bu təyinatı yaxşı qarşıladım.

- Rəhim Həsənovun hakimlər haqda fikirlərinə necə reaksiya göstərirsiz?
- Son mətbuat konfransında hakimlik haqda geniş danışmışdım. Ağır oyun olsa da, hər iki komanda baxımlı oynadı. Yaxşı futboldan danışmaq olar. Çempionatın səviyyəsi artır. Bu gün hakimlikdən yox, gözəl futboldan danışaq.

- Həm kubok, həm də çempionat var. Hara daha çox fokuslanmısız?
- Futbolçular da, biz də başa düşürük ki, gərgin mübarizə var. 3 komanda ilə ciddi mübarizə aparırıq. Çempionatı 4-cü yerdə bitirmək istəyirik. Finalda “Sabah” kimi rəqib var. Kuboku qazanmaq açıq sualdı. Əlimizdən gələnin ən yaxşısını etmək istəyirik.

- Elvin Cəfərquliyevin futbola qayıdışında sizin ciddi rolunuz var.
- Bu məyusedicidi. Qurban müəllim belə qərar verirsə, deməli, ciddi nə isə var. Onun müsahibələrini görmüşəm. Ehtimal edirəm ki, təkrar səhvlər edib. Komandasının və millinin aparıcı üzvlərindəndi. Ümid edirəm ki, hər şey onun üçün yaxşı olar.

- Kubokun finalına qədər “Qəbələ” və “İmişli” ilə oyunlarınız var. Nəzərə alsaq ki, heyətiniz o də geniş deyil, bu oyunlarda ciddi rotasiyalar görə bilərik? Qarşıdakı iki oyunu kubokun finalına qurban verəcəyinizi gözləmək olar?
- Qəti. Biz də rotasiyalar edirik. 5-6 dəyişikliklər etmişik. Futbolçuların durumundan da çox şey asılıdı.

- Papunaşvili son vaxtlar oynamır. Rəqabətdə uduzur, yoxsa fiziki problemləri var?
- Sistem dəyişikliyi oldu. 5 müdafiəçi ilə oynayırıq. Bunları nəzərə alıb, belə qərar vermişik. Qolu vurmasaydıq, onu meydana buraxacaqdım. İsinməyə göndərmişdim. Amma elə alındı ki, ehtiyac olmadı.

- Abbas Hüseynovun komandanıza gəlməsi gündəmdi. Ümumiyyətlə, yayda ciddi dəyişiklik gözlənilir?
- Avrokuboklara düşüb-düşməməkdən çox şey asılıdı. Mövsümün sonunu gözləmək lazımdı. Büdcə bilinməlidi. Bəziləri ilə müqavilənin müddəti başa çatır. Avrokuboklara vəsiqə qazansaq, danışmaq daha rahat olar. Abbasın mövqeyində Qismət var. Bu keçid hələ ki gündəmdə deyil.