Kişilər arasında Alkaras, qadınlar arasında Sobolenko...
Madriddə ənənəvi “Laureus World Sports Awards” beynəlxalq mükafatının qaliblərinin təltifat mərasimi keçirilib.
"Football-plus.az" xəbər verir ki, ispaniyalı tennisçi Karlos Alkaras “ilin kişi idmançısı” nominasiyasında qalib gəlib. 22 yaşlı Alkarasa mükafatı (“Cartier” brendinin hazırladığı statuetka) futbol əfsanələri – İker Kasilyas və Luiş Fiqu təqdim edib.
“İlin kişi idmançısı” adı uğrunda italiyalı tennisçi Yannik Sinner, fransalı futbolçu Usman Dembele, isveçli yüngül atlet Arman Düplantos, ispaniyalı motoyürüşçü Mark Markes və sloveniyalı veloyürüşçü Tadey Poqaçar da mübarizə aparırdı.
Alkaras ötən il “Böyük dəbilqə” seriyalı iki turnirin (“Rolan Qarros”, “US Open”) qalibi olub. O, mərasimdən sonra karyerasının gələcəyini necə gördüyünü deyib:
“Elit idmançının həyatının öz müsbətləri və mənfiləri var. Ancaq ən dəyərli məqam adamlarla ünsiyyət və dünyanı görmək imkanıdı. Bunlar daim mənlə qalacaq, hətta karyeramı bitirəndən sonra da vacib olacaq. Hələ də göstərməli olduğunu nəsə var. Ən yaxşı versiyamı dünya görməyib. İmkanlarımın son həddinə çatdığımı demək dərəcəsində yaşlanmamışam, gəncəm. Vaxtım var, hələ çox şey öyrənməliyəm, “artırmalıyam”. Fiziki, mental və oyun baxımından. Alkarasın ən yaxşı versiyası bir neçə il sonra olacaq. Uzun karyeraya ümid edirəm və bunun üçün mümkün olan hər şeyi edəcəm. Özüm üçün hansısa məhdudiyyətlər qoymaq istəmirəm. Ancaq əlbəttə, Cokoviçin 24 “Böyük dəbilqə”sindən hələ çox uzaqdayam”.
Alkaras indiyə qədər “Böyük dəbilqə” turnirlərində 7 qələbə qazanıb.
“İlin qadın idmançısı” nominasiyasında isə belaruslu tennisçi Arina Sobolenko qalib gəlib. İspaniya paytaxtında keçirilən mərasimin aparıcıları Novak Cokoviçlə çinli fristaylçı Eylin Qu idi. Sobolenko mükafat uğrunda mübarizədə futbolçu Aytana Bonmati, yüngül atletlərdən Melissa Cefferson-Vuden, Feyt Kipyeqon və Sidni Maklaflin-Levronu, həmçinin üzgüçü Keti Ledekini qabaqladı.
Belaruslu tennisçi ötən il “US Open”in qalibi olub, Brisben, Mayami və Madrid turnirlərində də 1-ci yeri tutub.
Digər xəbərlər
