Ötən mövsüm 2-ci liqada pley-offdan son anda uzaqda qalan, bu mövsüm də ilk “6-lıq”da qərarlaşsa da, eyri-sabit çıxış edən bir komanda var. Söhbət Azərbaycan futbolunda bəlli tarixə malik olan klubdan, ikiqat ölkə çempionu “Şəmkir”dən gedir.

“Football-plus.az” qərb təmsilçisinin yeni rəhbəri Adil Əliyevlə söhbət edib.

- Noyabrda Müşahidə Şurasının rəhbəri vəzifəsinə gəldiz. Əsas söz sahibi prezident Vüsal Məmmədov idi. İndi prezident sizsiz?
- Bəli, klub prezidentiyəm.

- Klubun gələcəyi ilə bağlı hansısa planlarınız var?
- Əlbəttə. Amma açıqlamaq istəmirəm, düşər-düşməzi olar (gülür). İstəyirik ki, klubun uşaq futbolu olsun, aşağı yaş komandalarımızı yaratmaq istəyirik. “Şəmki” köklü klubdu, bu hamıya bəllidi.

- Sizdə də stadion, meydança problemi var.
- Bu problem hər yerdə var. Çalışırıq ki, həll edək. Stadion tikməyə gücümüz yoxdu. İcra başçısının qəbulunda olmuşuq, sağ olsun, hər cür dəstək verir, torpaq ayırmaq istəyir. Gələcəkdə bəlkə yaxşı sponsor çıxar, stadion tikərik. İndi Olimpiya Kompleksinin stadionunda oynayırıq.

- Sponsor cəlb etmək üçün danışıqlar gedir?
- Şəmkirdə futbola maraq var. Hər sponsor üçün qapımız açıqdı. Əsas odu ki, futbol inkişaf etsin. Mən əvvəl dövlət qulluğunda işləmişəm. Kluba da Şəmkir futbolunun inkişafı üçün gəlmişəm. Klub dağıla bilərdi. “Şəmkir” dağılmamalıdı. Şəmkir camaatı olaraq birləşdik. Gənc futbolçularımız var. Gündə üç dəfə yeməklə təyin edirik, hər şey qaydasındadı.

- Protokolda baş məşqçi kimi Samir İsmayılov göstərilib. Hazırda komandanı o çalışdırır?
- Bəli. “Turan Tovuz”dan gəlib, B kateqoriyası var.

- Rasim Əliyev niyə ayrıldı? Nəticələrdən razı qalmadız?
- Şəxsi işlərinə görə ayrıldı. Rasim müəllim güclü məşqçidi, A kateqoriyası var. İndiki məşqçilər korpusu da onun komandasıdı. Samir müəllim də onun köməkçisi idi. Rasim müəllimdən narazı olsaydıq, onun komandası ilə işləməzdik.

- Gələn mövsüm iddialı “Şəmkir” görə biləcəyik?
- Qismət. İndi “Kür-Araz”la səfərdə, “Şirvan”la evdə oynayacağıq. Vacib oyunlardı. Gələn mövsüm daha iddialı olmağa çalışacağıq. Ötən mövsüm pley-off oynaya bilərdik. “Şimal”la “Quba” arasındakı oyunda ədalətsizlik oldu. Amma biz bunu şişirtmədik. Həmişə iddialı olacağıq. Hər kəs bizdən çəkinəcək, rəqiblərə başağrı olacağıq.

- Deyirsiz ki, komandadan razıyam, maliyyə probleminin olduğunu da demədiz. Sponsor yoxdusa, maliyyə hardandı? AFFA-nın verdiyi pulla dolanırsız?
- Onunla dolanmaq olar? Rayon camaatı, Şəmkir əhli kömək edir. Xalq Şəmkir futbolu adına birləşib.

- Amma belə davam edə bilməz. Sponsor lazımdı. 2-ci liqa klublarına Futbolun İnkişaf Fondu bu məsələdə yardım edir. Bu qurumla əlaqəniz var?
- Tural Piriyevlə iki dəfə görüşmüşük, iclasımız olub. Amma görüşəndə mən rəsmən klubda prezident deyildim. Əlaqələr quracağıq. FİF-in Azərbaycan futboluna töhfəsindən xəbərdarıq. İnşallah, köməyindən maksimum istifadə etməyə çalışacağıq. Biz döyülmək yox, döyüşmək üçün varıq. Maliyyə yaxşıdısa, hədəf də böyükdü. Yaya qədər də FİF-lə görüşəcəyik. Onların gördüyü iş göz qabağındadı.

- Komandadaxili ab-hava sizi qane edir?
- İlk hədəf “altılıq”da qalmaqdı. Yəqin ki, bunu bacaracağıq. Bizim istəyimiz mümkün qədər baxımlı oyundu. Əsas budu. Döyüşkən komandamız olsun, azarkeşlər futbola baxanda zövq alsın. Bu gün futbolçularımızdan razıyıq. Hamısı tərbiyəli uşaqlardı. Nəticələri də yaxşıdı. “Göygöl”lə oyunda şanslardan yararlana bilmədik. 11-ci dəqiqədə lehimizə penalti verilməliydi, olmadı. “Şəki” ilə oyunda iki penaltimiz verilmədi. Hakim də səhv edə bilər, insandı. Hansımız səhv etmirik ki?! Amma adam dilxor olur da.

- Futbolçular bazada qalır?
- Bəli. Çoxu bazadadı. Gündə üç dəfə yeməklə təmin olurlar. Başqa yerə çıxmırlar ki, fikirləri futbolda olsun. İstəyimiz tam peşəkar klub olmaqdı.

MÜZƏFFƏR QULUZADƏ