“Şəmkir” üçün yeni Saşa tapıldı! – Adil Əliyev gəldi, amma prezident də qalır
İkiqat ölkə çempionu, hazırda 2-ci liqada mübarizə aparan “Şəmkir”in düşərgəsində son vaxtlar vəziyyət heç də yaxşı deyildi, yəni klub ciddi maliyyə problemi yaşayırdı.
İş o yerə çatmışdı ki, “Şəmkir”in noyabrın 11-də 8-ci tur çərçivəsində “Araz Saatlı” ilə səfər oyununa getməsi belə sual altına düşmüşdü. Amma qəfil komandanın bəxtinə gün doğub. O gün, ya da günəş Adil Əliyevdi. Məhz o, komandanın Saatlıya yollanması ilə bağlı ən vacib xərcləri boynuna götürüb.
Dünən isə klubun “feysbuk” səhifəsində belə xəbər yer alıb:
“Klubun yeni rəhbəri və əsas idarəedici şəxs vəzifəsinə Adil Əliyev təyin olunub. Yeni rəhbərliyin məqsədi klubun idarəetmə strukturunu gücləndirmək, bölgə futbolunun inkişafına töhfə vermək və Şəmkir PFK-nı daha yüksək hədəflərə doğru aparmaqdı”.
Bəs klub prezidenti Vüsal Məmmədovun taleyi necə olacaq? O hara getdi? “Football-plus.az” Vüsal bəylə əlaqə saxlayıb: “Hər şey qaydasındadı. Dəyişiklik Müşahidə Şurasında olub. Mən klub prezidenti kimi qalıram”.
Klub Adil Əliyevi yeni rəhbər və idarəedici şəxs kimi göstərir, Vüsal bəy isə özünə prezident deyir. Görəsən, bu necə olur? Təbii ki, əsas məzmundu, forma deyil. Kim rəhbər olur-olsun, təki “Şəmkir”ə rəhmətlik Şahbaz Süleymanovun (Saşa) dönəmindəki əzəməti qaytarsın.MÜZƏFFƏR QULUZADƏ
Digər xəbərlər
