Tovuz stadionu ətrafında yeni müəmma – aprelin 12-si, saat 18.00-da...
Yaxşı ki “Turan Tovuz” cari mövsümdə yetərincə yaxşı nəticə göstərir, hazırda ölkəmizi avrokuboklarda təmsil etmək şansı ən yüksək qiymətləndirilən üç komandadan biridi. Yoxsa tovuzlu azarkeşlər komandanın doğma şəhərdən uzaq düşməsini klub rəhbərliyinə heç cür bağışlamazdı.
“Turan Tovuz”un ev oyunlarını keçirdiyi stadion ətrafında bu mövsüm yaşananlardan xəbərdarsız. Tovuz şəhər stadionunda ot örtüyü dəyişdirildiyi üçün "Turan Tovuz" 2025/26 mövsümünün əvvəlindən rəqiblərini Bakıdakı "Azərsun Arena"da qəbul etdi. Noyabrın 2-də “bozqurd” “Şamaxı” ilə ev oyununu doğma stadionda keçirə bildi. Amma elə həmin vaxt qazonun ideal vəziyyətdə olmadığı göründü. Ardından, yəni noyabrın 28-də “Neftçi”, dekabrın 13-də “Sabah” ilə ev oyunlarını Tovuzda keçirən komanda mövsümün ilk yarısını yola verdi. “Turan Tovuz” yanvarın 25-də “Sumqayıt”la ev oyununu Sumqayıtda keçirdi, fevralda ev oyunları üçün yenidən “Azərsun Arena”ya sığındı. Burda “Karvan-Yevlax”, “Zirə” və “İmişli” ilə oyunlar keçiriləndən sonra bəlli oldu ki, növbəti dəfə köçmək lazımdı. Çünki “Azərsun Arena” da təmirə bağlanır.
Martın 10-da PFL-in saytında belə bir məlumat yer aldı:
“Turan Tovuz”un müvəqqəti çıxış etdiyi “Azersun Arena”nın da təmirə bağlanması səbəbindən (“Turan Tovuz”un bu stadiondan yalnız fevralda istifadə edəcəyi əvvəlcədən rəsmi şəkildə bildirilmişdi) 25-ci tur oyununun, həmçinin Bizon Azərbaycan Kubokunun yarımfinal mərhələsi çərçivəsində keçiriləcək ev qarşılaşmasının Mehdi Hüseynzadə adına Sumqayıt şəhər stadionunda təşkili ilə bağlı Peşəkar Futbol Liqasına müraciət daxil olub. Tovuz şəhər stadionundakı mövcud durum, klubun müraciəti, eləcə də “Sumqayıt”ın razılıq məktubu nəzərə alınaraq Peşəkar Futbol Liqası tərəfindən “Turan Tovuz”un Misli premyer-liqasının 25-ci tur qarşılaşmasını və Bizon Azərbaycan Kubokunun yarımfinal mərhələsindəki ev oyununu Mehdi Hüseynzadə adına Sumqayıt şəhər stadionunda keçirməsinə qərar verilib. Sözügedən qarşılaşmalardan sonra Tovuz şəhər stadionunun ümumi vəziyyəti yenidən qiymətləndiriləcək və 26-cı turdan etibarən komandanın ev oyunlarının Tovuz şəhər stadionunda keçirilib-keçirilməməsi ilə bağlı əlavə qərar qəbul olunacaq”.
İndi isə başqa məqama toxunaq. PFL-in saytında yer alan 27-ci turun afişasında aprelin 12-si, saat 18.00-a nəzərdə tutulan “Turan Tovuz” - “Sumqayıt” oyununun keçiriləcəyi yer kimi Tovuz şəhər stadionu göstərilib.
Belə çıxır ki, PFL artıq “Turan Tovuz”un evdə oynaya biləcəyinə tam əmindi? Axı bununla bağlı hansısa rəsmi açıqlama yoxdu.
“Football-plus.az” müəmmalı durumla bağlı PFL-in Media və Marketinq direktoru Sənan Abdullayevin fikrini öyrənib:
“Martın 28-dən etibarən vəziyyət xüsusi nəzarətə alınıb. Əlaqədəyik, qeydlərimizi aparırıq. Hazır olan kimi gedib baxacağıq. Hazır olmasa, alternativ addımlar atılacaq”.
MÜZƏFFƏR QULUZADƏ
Digər xəbərlər
