"Kəpəz" Misli premyer-liqasının 21-ci tur matçında "Sabah"a uduzdu - 0:1.

"Football-plus.az" xəbər verir ki, Gəncə təmsilçisinin baş məşqçisi Azər Bağırov oyunsonrası mətbuat konfransında jurnalistlərin suallarını cavabladı.

- Futbolçularıma yaxşı vuruşduqları üçün təşəkkür edirəm. Ani diqqətsizlikdən qapımızdan qol buraxdıq. Əvəzetmələr zamanı ən yaxşı oyunçuları meydana buraxdıq. Futbolçularım üçün gözəl təcrübə oldu. Soyuq havada stadiona gələn azarkeşlərə də minnətdarlığımı bildirirəm.

- Ötən mövsüm komandanı premyer-liqada saxlamağı bacardız. Bu il də bunun üçün çalışırsız. Hər iki mövsümü müqayisə etsəz, nə kimi çətinlik və ya dəyişiklik görürsüz?
- Ötən il legioner daha çox idi. Digər komandalarla müqayisə etsəz, ən az legioner bizdədi. Əlimizdən gələnin yaxşısın etməyə çalışırıq. "Turan Tovuz"la matçda fikir versəz, rəqibdən meydanda 2 azərbaycanlı futbolçu var idisə, bizdə bu rəqəm 9 idi. Bu gün keçirilən matçda da "Sabah"ın heyətində elə məqam oldu ki, rəqibdən azərbaycanlı futbolçu yox idi, bizdə isə 7 nəfər mübarizə aparırdı.

- "Neftçi" ilə son matçda "Kəpəz" azarkeşlərinin "Neftçi" fanatları ilə birlikdə "Qarabağ"a qarşı şüarlarını necə dəyərləndirirsiz?
- Bu şüar haqda eşitməmişəm. "Qarabağ"la bizim nə ədavətimiz, nə də rəqabətimiz var. Azərbaycanda Avropadakı uğurlarına görə, hörmət olunası klub varsa, bu "Qarabağ"dı.