"Kəpəz" Misli premyer-liqasının 33-cü tur matçında "Neftçi"nin meydanından "sülh"lə ayrıldı - 2:2.

"Football-plus.az" xəbər verir ki, "sarı-göylər"in baş məşqçisi Azər Bağırov oyunsonrası mətbuat konfransında jurnalistlərin suallarını cavabladı.

- Azarkeşlərimizə təşəkkür edirəm. İkinci hissə istəyimiz kimi keçdi. Birinci yarıda qol buraxsaq da, fasilədən sonra önə keçə bildik. Təəssüf ki, son anda penaltidən qol buraxdıq. Amma üzülməməliyik. Əsas odu ki, xal ehtiyatımızı artırdıq. Futbolçularım qladiator kimi döyüşdü.

- "Araz-Naxçıvan"ın baş məşqçisi olanda "Neftçi"ylə matçın fasiləsində 4 dəyişiklik edib qələbə qazanmışdız. Bu gün də eyni hal təkrarlandı. "Neftçi"nin zəif yönlərini bilirsiz?
- Bəli... Birinci hissədə daha çox siyasi addımlar atdıq - rəqibi üstümüzə çəkdik. Sonra isə sürətli futbolçular sayəsində təhlükəli əks-hücumlar həyata keçirdik. Meydana eyni anda 4 hücumameyilli oyunçu buraxanda rəqibi fiziki baxımdan hazırlıqsız yaxalayırsan.

- Əslində, səfərdə "Neftçi"dən xal almaq pis nəticə deyil. Amma futbolçularınız çox məyus görünürdü...
- Heç kim əlavə vaxtda qol buraxmaq istəməz. Qələbə qazansaq, premyer-liqada qalmağımız rəsmiləşəcəkdi. Qışdan zonra ən çox xal toplayan komandalardan biriyik. Məncə, bu imkanlarla belə nəticələr qazanmaq "Kəpəz" üçün çoxdu.

KƏNAN BAHADIR