“Mingəçevir” qış fasiləsindən ən yaxşı yararlanan 1-ci liqa təmsilçilərindən biri, bəlkə də birincisidi.

Mövsümün əvvəlində Ramiz Məmmədovla müqavilə bağlayan klub heyətini bir neçə təcrübəli futbolçu ilə gücləndirib. Samir Abdullayev və Qurban Səfərovla yollarını ayıran Qərb təmsilçisi “Sumqayıt”, “Araz-Naxçıvan”, “Karvan-Yevlax”da oynamış Qabil Əlizadə, 24 yaşlı qapıçı, bir neçə klubda 1-ci liqa təcrübəsi olan Əmrah Məmmədli, 22 yaşlı, “Karvan-Yevlax”da cəmi 1 kubok oyununa çıxan Nika Çaçaşvili, təcrübəli futbolçu Bahadur Həziyev, “Araz-Naxçıvan”dan Elçin Mustafayev, “Kəpəz”dən Şahmar Aşurov, vaxtı ilə premyer-liqanın bombardiri olan Nurlan Novruzov, 33 yaşlı təcrübəli futbolçu Amil Yunanovu heyətinə qatıb. “Zirə”nin əvəzedici komandasından Əkbər Eyubov, əsas komandasından isə şans qazana bilməsə də, iki mövsüm əvvəl “Şamaxı”da özünü ən yaxşı tərəfdən göstərən Fuad Bayramov da artıq “Mingəçevir”in uğurları üçün çalışacaq.

Mövsümün gedişində az qala dağılacağını gözlədiyimiz “Mingəçevir” bəzi elita təmsilçilərindən daha yaxşı transferlər edib. Klubun qeyri-rəsmi rəhbəri Adnan Əhmədzadənin sentyabrda qəfil həbs olunması “Mingəçevir”in dağılacağı ilə bağlı söz-söhbəti artırmışdı. Lakin “nur şəhəri”nin təmsilçisi yayda edə bilmədiyi transferlərdən qat-qat artığını etdi.

Klub rəsmiləri hədəfin çempionluq olduğunu aşkar şəkildə bildirir. Dilləri qədər dilçəkləri də var. Ən azı etdikləri transferlər bunu göstərir. İrəli xətt daha çox güclənib. Əslində komandanın qol vurmaqla bağlı problemi yoxdu. Çempionatda “Şəfa”dan sonra ən çox qol vuran məhz “Mingəçevir”di - 21 top. Ramiz Məmmədovun çalışdırdığı komanda qış fasiləsindən sonrakı ilk oyunu sabah “Şimal”a qarşı keçirəcək. Rəqib autsayder olsa da, qazanılacaq qələbə komandada özünəinamı artıracaq. Növbəti iki tur isə həqiqətən də çempionluq, minimum mükafatçı yerlər uğrunda oynayan komandanın real gücünə aydınlıq gətirəcək. Belə ki, Məmmədovun komandası 14-cü turda “Zaqatala”nı qəbul edəcək, bir tur sonra çempionluğa əsas namizəd “Şəfa”nın qonağı olacaq.

Ötən mövsüm 8-ci yerdən 4-cü pilləyə qədər yüksələn komanda indi daha da güclüdü. Amma maraqlı məqam başqadı: klub bu pulu hardan tapır? “Mingəçevir”in rəhbəri Rafael Bünyatov ötən günlərdə “Teleqraf.az”a müsahibəsində ASTA-nın prezidentinin özü olduğunu, maliyyənin də AFFA ilə ASTA-dan gəldiyini bildirib. Hətta üç ildən sonra “Mingəçevir”in premyer-liqada da iddialılardan olacağını deyib.

Görünən odu ki, “Mingəçevir” bu mövsümdəcə elitaya yüksəlmək niyyətindədi. Əməlləri də istəkləri ilə düz-mütənasibdi. Qalır bircə nəticələr...

MÜZƏFFƏR QULUZADƏ