"Yoxlama oyunlarındakı nəticələr bizi aldatmamalıdı" - Sxadadze
"Qəbələ" növbəti yoxlama oyununu keçirib. "Qırmızı-qaralar" 1-ci liqa təmsilçisi "Baku Sportinq"lə qarşılaşıb. Görüş "Qəbələ"nin 7:1 hesablı qələbəsi ilə başa çatıb.
"Football-plus.az" xəbər verir ki, matçdan sonra "Qəbələ"nin baş məşqçisi Kaxaber Sxadadze oyun barədə fikirlərini bölüşüb. Mütəxəssis komandasının çox qol vurmasından məmnunluğunu ifadə edib. Lakin o, belə görüşlərdə nəticənin həlledici olmadığını, əsas məqsədin futbolçuların verilən tapşırıqları icra etməsi olduğunu vurğulayıb:
"Bizim üçün vacib o idi ki, yoxlama oyunu keçirək. Şadıq ki, çox qol vurduq. Lakin belə oyunlarda nəticə əhəmiyyət kəsb etmir. Əsas odu ki, futbolçular onlara verilən tapşırıqları yerinə yetirsin. Müəyyən səhvlər oldu və bunun üzərində işləyəcəyik. Artıq çempionatın başlamasına bir həftə qalır. Yaxşı hazırlaşmaq lazımdı".
Mütəxəssis qarşıdakı rəsmi oyundakı ciddi itkilərdən də söz açıb: "Təəssüf ki, iki futbolç - Xayme Syerra və İbrahima Sanqare cəzalı olduqları üçün "Şamaxı" ilə matçda bizə kömək edə bilməyəcək".
Baş məşqçi yoxlama görüşlərinin nəticələrinə aldanmamağın vacibliyini qeyd edərək deyib:"Yoxlama oyunlarındakı nəticələr bizi aldatmamalıdı. Yoxlama matçları ilə çempionat oyunları arasında böyük fərq var. Əsas odu ki, qarşıdakı rəsmi oyunlara yaxşı hazırlaşaq".
Digər xəbərlər
