“Qarabağ” qış təlim-məşq toplanışını Antalyada davam etdirir. Dünən builki ilk yoxlama oyununu keçirən “köhlən atlar” Özbəkistan “Neftçi”sini darmadağın etdi – 5:0.

“Football-plus.az” xəbər verir ki, Fərqanə təmsilçisi oyun haqda rəsmi saytında məlumat yayıb. Klubun mətbuat xidməti ağdamlıları çox güclü komanda adlandırıb. Bildirilib ki, komandanın baş məşqçisi İslombek İsmayılov da rəqibin çalışdırıcısı Qurban Qurbanov kimi fasilədə start heyətini tam dəyişib. Hər halda, böyükhesablı məğlubiyyətdən qurtulmaq mümkün olmayıb.

Sayt “Qarabağ”ın avrokuboklarda qazandığı uğurlardan bəhs edib. “Köhlən atlar”ın cari mövsümdə Çempionlar Liqasında əldə etdiyi xallar xüsusi qabardılıb. Həmçinin “Neftçi”nin saytında ağdamlıların tarixi və indiki durumu haqda geniş məlumat verilib.

Amma fərqanəlilərin məğlubiyyətini azarkeşləri qınayıb. Onlar belə hesab edir ki, komanda yüksək şərait qarşılığında daha yaxşı nəticə göstərməyə borcludu.

Xatırladaq ki, “Qarabağ” növbəti yoxlama oyununda “Zaqlebiye” ilə üz-üzə gələcək. Polşalılarla matç yanvarın 16-da keçiriləcək.

KƏNAN BAHADIR