"Portuqaliyalı agentlər məndən “Qarabağ”ın üç futbolçusu haqda məlumat almışdı" - Elvin niyə getmir?
Bilindiyi kimi, “Futbol+”in 27-ci dəfə keçirdiyi “İlin ən yaxşı futbolçusu” sorğusunun qalibi “Qarabağ”ın müdafiəçisi Elvin Cəfərquliyev oldu.
Bəllidi ki, bu sorğuda futbol ictimaiyyətinin əksər nümayəndələrinin səs haqqı olduğundan, qalibin bu adı nə dərəcədə haqq edib-etmədiyi müzakirəyə qapalı mövzudu. Kimsə Elvinin qələbəsinə şübhə edə bilməz. Bir daha xatırladaq ki, “Qarabağ”ın cinah müdafiəçi ən yaxın izləyicisi – həmklubu Bəhlul Mustafazadəni 96 xal qabaqladı.
İndi sual doğuran daha bir məqam 2025-in ən yaxşı futbolçusunun karyerasının necə davam edəcəyidi. Müasir futbolda daha uca zirvələrə qalxmaq üçün sükanı olduğu kimi saxlamaq belə işə yaramaya bilər. Bununla belə, ilin ilk günlərində Elvinlə bağlı maraqlı iddialar ortaya atılıb. Məsələn, “Qarabağ” onunla cari mövsümün sonuna qədər qüvvədə olan müqavilənin müddətini daha 3 il artırmaq niyyətindədi. Son bilgi belədi ki, sol cinah müdafiəçisi özü də bu addımda maraqlıdı. Azı ona görə ki, başqa kluba gedəcəyi təqdirdə sabiq komandasına daha çox pul qazandıra bilsin.
Başqa klub demişkən, futbolçuya ölkə xaricindən gələn təkliflər də var. Bəzi həmkarlarımız bildirir ki, A seriyasının bir neçə iştirakçısı Elvinlə yaxından maraqlanır. Öz aramızdı, 25 yaşlı oyunçu da legioner həyatı yaşamaq istəyir. O, hələ bir neçə ay əvvəl demişdi ki, yaxşı təklif gəlsə, “Qarabağ”dan gedəcək, sadəcə, bunun üçün şərtlər uyğun olmalıdı.
Bəs, Elvin hazırda hansı addımı atmalıdı ki, karyerasında daha ciddi irəliləyişə nail olsun? Onun legioner həyatı yaşamağa hazır olduğunu demək mümkündümü? Bu sualları menecer Emil Şükürova ünvanladıq:
“Onun ilin ən yaxşı futbolçusu seçilməsinə təəccüblənmədim. Çünki son iki-üç ildə yüksək səviyyədə oyun sərgiləyib. Məncə, legioner həyatı yaşamağa çoxdan hazırdı. Hətta bir neçə il əvvəl portuqaliyalı agentlər məndən “Qarabağ”ın üç futbolçusu haqda məlumat almışdı. Bu sırada Elvin də var idi. O, Avropada çıxış edə bilər. Fiziki hazırlıq səviyyəsi çox yaxşıdı. Bu səbəbdən fiziki güc tələb edən çempionatlarda çıxış edə bilər. Xatırlayıram ki, macarıstanlı sol cinah müdafiəçilərindən biri yaxınlarda çempionşipə transfer olundu və hazırda yaxşı oyun göstərir. Məncə, Elvin də bu çempionatda sözünü deyə bilər. Ona lazım olan şey özünü psixoloji baxımdan daha üstün səviyyəyə çatdırmaqdı. Hiss olunur ki, emosional futbolçudu. Oyun tərzi, sürəti, matça köklənməsi, hücuma yardım etməsi, məhsuldar ötürmələri, cərimə meydançasına daxil olması, demək olar kİ, qüsursuzdu. “Qarabağ” Elvinlə müqavilənin müddətini artırırsa, deməli, onu baha qiymətə satmağa hazırlaşır. Təcrübə bunu göstərir. Elvin “Qarabağ”a daha çox pul qazandırmaq istəyir. Belədisə, doğru addımdı. Onu bu səviyyəyə çatdıran komandaya bu cür təşəkkür etmək olar. Elvinə uğurlar arzulayıram. İnanıram ki, legioner həyatı yaşayacağı halda, ölkəmizi layiqincə təmsil edəcək”.
KƏNAN BAHADIR
Digər xəbərlər
