Məlum olduğu kimi, ölkəmizdə 2025-ci ilin ən yaxşı futbolçusu “Qarabağ”ın formasını geyən Elvin Cəfərquliyevdi. O, bu ada “Futbol+”in 27-ci dəfə keçirdiyi ümummilli sorğu nəticəsində layiq görüldü. Bu mövzuda mübahisə etməyin tərəfdarı deyilik. Hər halda, o, ən yaxın izləyicisi, komanda yoldaşı Bəhlul Mustafazadəni 96 səs qabaqladı.

Heç şübhəsiz, qalib indi gələcəyini düşünməyə məcburdu. Azı ona görə ki, legioner həyatı yaşamaq vaxtı çatıb! Onun həm “Qarabağ”da, həm də milli komandada göstərdiyi performansla xarici klubların diqqət mərkəzinə düşdüyü bəllidi. Bəli, Elvin əvvəl də əcnəbi komandalardan təklif alıb və müxtəlif səbəblərdən transfer mümkün olmayıb. Ancaq indi tam zamanıdı! Niyə? Birincisi, artıq 25 yaşı var. Ölkəmizin adını layiqincə təmsil edə biləcək formadadı. Üstəlik, psixoloji baxımdan daha arxayın, inamlı görünən oyunçu əsəblərini cilovlamağın yollarını da öyrənib. Öz aramızdı, başqa nə çatışmazlığı var idi ki?!

Uzun müddətdi mətbuatda futbolçunun A seriyası klublarının birindən təklif aldığı iddia olunur. Elə Elvin özü də dəfələrlə legioner həyatı yaşamaq arzusunda olduğunu bildirib. İndi bu istək üçün hansısa maneə qalmayıb. Hə, “Qarabağ” bu gün Çempionlar Liqasının pley-off mərhələsinə vəsiqə qazanmağa yaxındı. Bu gerçəkləşsə, Elvinin də bazar dəyəri artacaq. Üstəlik, onun qarşıdakı görüşlərdə göstərəcəyi oyun daha iddialı klubların marağını çəkə bilər. Bəlkə məhz bu səbəbdən yaya qədər gözləmək yanlış qərar olmaz. Lakin bir reallıq var. Elvin “Qarabağ”ı nə qədər tez tərk etsə, fərqli ölkəyə, komandaya öyrəşmək üçün o qədər çox vaxtı olacaq. Hələ onu demirik ki, “Qarabağ” futbolçuyla müqavilənin müddətini daha 3 il uzatmaqla satışdan gələn qazancını artıracaq.

Həqiqətən belə fürsəti boşa vermək olmaz. İndi “tələsən təndirə düşər” demək yox, “bugünün işini sabaha saxlama” demək daha məqsədəuyğundu.

Haydi, Elvin, gecikmə. Uğurlu legioner həyatı sənə “gəl-gəl” deyir!

KƏNAN BAHADIR