"Əvvəl fürsətdən istifadə edib, 2026-cı ilin bütün futbol ictimaiyyəti üçün xeyirli olmasını arzulayıram. 2025-ci ildə FİF əməkdaşları qarşısında qısamüddətli və uzunmüddətli nəticələr üçün bir çox hədəflər qoyulmuşdu. Nəticə olaraq baxsaq, ötən il ərzində iki klubla baş sponsorluq müqaviləsi imzalanması, bir bölgədə “biznes-klub” layihəsinə start verilməsi, bir neçə əlavə tərəfdaşlıqlar imzalanması, UEFA-nın Uşaq Fondu tərəfindən xüsusi mükafat və bir layihəmizə qrant ayrılmasını vurğulamaq olar. Bununla yanaşı, uzunmüddətli nəticələri hədəfləyən işlərin önəmi yuxarıdakılardan heç də az deyil. Bunlar əsasən klubların dayanıqlı inkişafının təmin edilməsi, əməkdaşların bilik və bacarıqlarının artırılması, idman idarəetməsi üzrə təhsil layihəsinin yekunlaşdırılması ilə bağlıdı. Xüsusi vurğulamaq lazımdı ki, 1-ci və 2-ci liqalarda mübarizə aparan klubların çoxunun, premyer-liqa klublarının bir qisminin büdcəsi əsasən dövlət proqramı sayəsində formalaşır. Dayanıqlı maliyyə kanalları formalaşdırılması, klubların “öz ayağı üzərində dura bilməsinin” təmin edilməsi önəmlidi. Ötən il bir neçə klub maliyyə ilə bağlı çətinliklər yaşadı, hətta bəzi klublar dağılmaq təhlükəsi ilə üz-üzə qaldı. Təbii ki, FİF olaraq, onlara öz dəstəyimizi göstərdik. Ancaq belə halların yaşanmaması üçün dayanıqlı maliyyə kanallarının formalaşdırılması vacibdi. 2026-cı illə bağlı planlara gəlincə, AFFA-nın İnkişaf Strategiyası çərçivəsində FİF-in üzərinə düşən bir çox hədəf var. Bölgələrin xüsusiyyəti, klubların prirotetləri, struktur və bacarıqlarını nəzərə alaraq, fərqli klublar üçün fərqli layihələrin həyata keçirilməsi nəzərdə tutulub. Uzun müddətdi danışıqlar apardığımız şirkətlər və sahibkarlar var. Yeni tərəfdaşlıqların olacağını istisna etmirəm. Düzdü, yeni sponsor və tərəfdaşlıqların imzalanması daha çox yadda qalır, amma yuxarıda da vurğuladığım kimi, bizim üçün klubların “öz ayağı üzərində dura bilməsinə” nail olmaq daha önəmlidi".