Qarşıdan gələn Türkiyə superkuboku matçları ilə bağlı sürpriz xəbərlər gəlməkdədi.

"Football-plus.az" xəbər verir ki, bu turnir bu il ilk dəfə yeni formatda - 4 komandanın iştirakı ilə keçiriləcək. Yanvarın 5-də baş tutacaq ilk yarımfinalda ''Qalatasaray''la ''Trabzonspor'', bir gün sonra isə ''Fənərbaxça'' ilə ''Samsunspor'' qarşılaşacaq. Bu arada həm ''Qalatasaray''ın, həm də ''Trabzonspor''un oyunun başqa vaxta keçirilməsi ilə bağlı Türkiyə Futbol Federasiyasına müraciət ünvanladığı məlum olub. Buna səbəb kimi isə hava şərtləri, uğursuz zaman seçimi və klubların heyətlə bağlı sıxıntı yaşaması göstərilir. Bundan başqa oyuna marağın çox aşağı olması da klubları buna vadar edib.

Biletlərin günlər öncə satışa çıxarılmasına baxmayaraq indiyə qədər ''Qalatasaray'' - ''Trabzonspor'' matçına cəmi 5 minə yaxın bilet satılıb. Bu baxımdan hələ ki, federasiyanın ümidləri doğrulmayıb. Bu qarşılaşma 30 min azarkeş tutumuna malik ''Qaziantep Stadionu''nda keçiriləcək. Federasiyanın bütün bu məqamları nəzərə alaraq superkubok matçı ilə bağlı hansı qərarı verəcəyi böyük maraq doğurur. ''Fənərbaxça'' ilə ''Samsunspor''un da eyni şəkildə TFF-yə müraciət edib-etməməsi ilə bağlı dəqiq məlumat yoxdu. Amma bir çox mənbələr bu klubların da qarşıdakı matçın başqa tarixə keçirilməsinin tərəfdarı olduğunu iddia edir.