“Araz-Naxçıvan”ın İdarə Heyətinin iclası keçirilib.

"Football-plus.az" xəbər verir ki, iclasda əsas komandanın qış fasiləsinə qədərki çıxışı müzakirə olunub.

Nəticələr qeyri-qənaətbəxş hesab olunduğuna görə, baş məşqçi Elmar Baxşıyevlə yolların ayrılması qərara alınıb. Daha sonra baş məşqçi ilə görüş keçirilib, ona kluba göstərdiyi xidmətlərə görə təşəkkür edilib və mövsümün sonuna qədər nəzərdə tutulan müqaviləyə qarşılıqlı razılıq əsasında xitam verilib.

Qeyd edək ki, Baxşıyev 2024-cü ilin aprelində “Araz-Naxçıvan”ın baş məşqçisi təyin olunub. Komanda onun rəhbərliyi altında 2024-25-ci illər mövsümündə Misli premyer-liqasında üçüncü pilləni tutub və Konfrans Liqasında iştirak edib.

Əlavə edək ki, "Araz-Naxçıvan" Misli premyer-liqasında 16 turdan sonra 26 xalla 6-cı pillədə qərarlaşıb. Komandanı 3-cü pillədəki "Zirə"dən 2 xal ayırır.