final
Rasinq - Estudiantes 1:1 (0:0, 1:1, 0:0), p. 4:5
Rasinq (Avelyaneda): Kambeses, Mura (M.Torres, 87), Kolombo, A.Qarsiya, Roxas, S.Sosa, Nardoni (Sukulini, 101), Almendra (A.Fernandes, 75), Solari (Koneçni, 75/Vyetto, 119), A.Martines, Verqara (Pardo, 87).
Estudiantes (La Plata): Muslera, R.Qomes (Mesa, 83), Nunyes (F.Rodriges, 96), Qonsales Pires, Arsamendiya (Benedetti, 89), Askasibar, Pyovi (Alario, 83), Medina (X.Sosa, 89), T.Palasios (Burqos, 74), Karrilyo, Setre.
Qollar: A.Martines, 81 (1:0). Karrilyo, 90+3 (1:1).
Penalti seriyası: X.Sosa – 0:1. A.Martines – 1:1. Setre – 1:1 (qapıçı). Vyetto – 2:1. Alario – 2:2. A.Qarsiya – 3:2. Burqos – 3:3. M.Torres – 3:3 (qapıçı). Mesa – 3:4. S.Sosa – 4:4. F.Rodriges – 4:5. Pardo – 4:5 (qapıçı).
Vərəqələr: R.Qomes, 34. Karrilyo, 37. T.Palasios, 42. A.Martines, 47. Kolombo, 70. Pardo, 90+5. Benedetti, 119 - sarı.
Hakim: Nikolas Ramires.
13 dekabr. Santyaqo del Estero. 42000 tamaşaçı.

Dekabrın 13-də Argentina çempionatının Klausura (bağlanış) adlanan ikinci mərhələsi sona çatdı. Həmin gün keçirilən finalda qalib müəyyənləşdi. Əlbəttə, ölkənin heç bir nəhəng klubunun finalçıların sırasında görünməməsi diqqətdən yayına bilməzdi. Amma “Rasinq” ilə “Estudiantes” həlledici oyuna, necə deyərlər, alınlarının təri ilə, layiqli şəkildə çıxmışdılar. Xatırladaq ki, A qrupunda 3-cü yeri tutan “Rasinq” 1/8 finalda “River Pleyt”i (3:2), 1/4 finalda “Tiqre”ni (0:0, p. - 4:2), yarımfinalda isə “Boka Xuniors”u (1:0) mübarizədən kənarlaşdırmışdı. A qrupunu 8-ci yerdə başa vuran “Estudiantes” isə əvvəlki mərhələlərdə “Rosario Sentral”a (1:0), “Sentral Kordoba”ya (1:0) və “Ximnasiya”ya (1:0) üstün gəlməklə böyük sürprizlərə imza atmışdı.

Neytral meydanda - Santyaqo del Estero şəhərində keçirilən finalın ilk hissəsi qol vəziyyətləri baxımından kasad alındı. Hər iki komandanın arxa xətti hücumundan daha yaxşı təsir bağışladı. “Rasinq” topa 54 faiz nəzarət etməklə rəqibi üzərində üstünlüyə malik oldu. Lakin Qustavo Kostasın çalışdırdığı komanda bu üstünlüyündən uzun müddət yararlana bilmədi. Nəhayət, Adrian Martines 81-ci dəqiqədə avelyanedalıları hesabda önə keçirdi. Bu fakt rəqibi sanki yuxudan oyatdı. “Estudiantes” dərhal üstünlüyü ələ alaraq cavab qolunu vurmağa çalışdı. Eduardo Domingesin komandasının cəhdləri son anda bəhrə verdi: Karrilyonun 90+3-cü dəqiqəyə təsadüf edən dəqiq zərbəsi mübarizənin əlavə vaxta qədər uzanmasını qaçılmaz etdi.

Tərəflər 30 dəqiqəlik “overtaym”da qapıya yol tapa bilmədilər və qalib penalti seriyasında müəyyənləşdi. Bu sınaqdan 39 yaşlı məşhur uruqvaylı qapıçı Musleranın iki seyvi ilə 5:4 hesabıyla qalib çıxan “Estudiantes” Klausuranın çempionu oldu. Əlavə edək ki, Domingesin komandası ilə çempionatın Apertura (açılış) mərhələsinin qalibi “Platense” arasında 2025-ci il mövsümünün çempionu adı uğrunda hələ ki tarixi müəyyənləşməyən oyun keçiriləcək.

Bombardirlər: R.Martines (Platense) - 8, Di Mariya (Rosario Sentral), Kastilyo (Lanus), Merentyel (Boka Xuniors), M.Torres (Ximnasiya) - 7.