“Qarabağ” Çempionlar Liqasında evdə “Ayaks”a 2:4 uduzmaqla ilk 24 komanda sırasına düşmək şansını kəskin azaltdı.

Ağdamlıların baş məşqçisi Qurban Qurbanov oyundan sonra jurnalistlər önünə çıxdı.

- Rəqibi təbrik edirəm. Oyundan sonra baş məşqçiləri oyunçuları tərəfə getdi. Görüşsək, yaxşı olardı. Oyunçularımdan razı qaldım. Son illərdə belə dinamik, məhsuldar oyun nadir hallarda olurdu. Səhvlərdən maksimum istifadə edirlər. Bura ÇL-di. İstənilən nəticəni gözləmək lazımdı. “Ayaks”da əvvəlki 5 oyunda alınmayan indi alındı. Döyüşərək məğlub olduq. Bərabərlik haqda düşünmürdük. Hücumda daha çox olmağa çalışırdıq. Əsl futbol bayramı idi. Bircə qələbə çatmadı. Belə nəticələrə hazır olmaq lazımdı.

- Qarabağ" qələbə istəyirdi deyə, hesabda öndə olanda da irəli atılırdı və əks-hücumlardan qol buraxdı?
- Futbolçularıma bildirmişəm ki, belə böyük oyunlarda sona qədər oynamalıyıq. Qol vurduq, müdafiədən oynayaq, filan...Yox. "Ayaks" topla yaxşı davransa da, risklərə gedirdik. Ona görə qol epizodları saysan, bəlkə bizdə daha çox idi. Nədən razı qaldım? Dünən hazırlaşmışdıq ki, hansı hücumları edəcəyik. Xeyli hücumumuz oldu.

- Səhvlər nədən qaynaqlandı?
- İlk iki qol uzaqdan vuruldu. Burda diqqətsiz olduq. 3 və 4-cü qol əks-hücumdan buraxıldı. Ustalıq. Hücuma çıxanda, sol cinahda Mateus qabaqda oldu deyə qol buraxdıq. Elvin Cəfərquliyev daha diqqətli olmalı idi. Sağ və sol müdafiəçilərimizin üstün tərəfidi ki, hər ikisi hücumda fəal çıxış edir. Qapımızda qollar gördük, oyunun sonları idi, bəlkə onlarda yorğunçuluq var idi. O epizodlarda sürətdə uduzduq.

- Oyunun qırılma anı Zubirin qaçırdığı epizod idi?
- Elə epizodlar çox oldu. 1:0-da da qol şanslarımız var idi, 2:2-də də. Saya bilərik. Epizodlardan, əlbəttə ki, rəqib daha yaxşı istifadə etdi.

- Sonradan meydana buraxdığınız oyunçulardan nə dərəcədə razı qaldız? Xüsusilə də Nərimandan.
- Tam razı qalmadım. Yağışlı hava idi, meydana sonradan daxil olmaq çətin idi. Sürəti artırmaq istəyirdik. Kaşuk, Nəriman daha dəqiq olsaydı, fərqli nəticə olardı. İlk dəfə deyil ki, belə addımlar atmışıq. Sadəcə, bu dəfə alınmadı.

- Nəriman Axundzadənin performansından razı qalmayıb azarkeşlər. Deyirlər ki, o, meydana çıxanda "Qarabağ"ın hücum xətti zəifləyir.
- Əfsuslar olsun ki, Nərimanla bağlı müzakirələr çox gedir. Mən özüm bilmirəm Nəriman haqda nə deyim. Hansısa fikir bildirsəm, bəlkə azarkeşə qarşı çıxmış olaram. Nəriman daha yaxşı oynaya bilərdi. Tək o yox, sonradan meydana çıxanlar. Oyuna kənardan baxıb həzz alırdım. 90 dəqiqə dinamika var idi.

- "Ayntraxt"dan oyundan əvvəl bizim çempionatımızda bir həftə fasilə olacaq. Bundesliqa davam edəcək. Bu amil “Qarabağ"a pis təsir edə bilər?
- Ola bilər. Çünki onlar daha yaxşı idman formasında olacaqlar. Çıxış yolumuz yoxdu. Yoldaşlıq oyunları keçirməyi fikirləşəcəyik. Çempionat oyunlarına hazırlaşacağıq. Futbolçular üçün psixoloji tərəfdən asan olmayacaq. İstirahət vaxtından maksimum faydalı istifafə etməliyik.

- “Qarabağ” 7 xal yoplayıb. U-19 komandanız isə 6 matçın, demək olar ki, hamısında böyük hesabla uduzdu.
- Bu bizim Azərbaycan futbolunun yeridi. U-19 komandamızda fərq bu qədər hiss olunursa, 4-5 il sonra bu səviyyədə oyunlarda hansı səviyyədə olacaq? Bu, bizim üçün böyük təhlükədi. Bəlkə də vuruşmağımız, nəticələrimiz bizi aldadır. Amma gələcəyə baxsaq, fərq çox böyüyə-böyüyə gedir. 4-5 ildən sonra sonu necə olacaq, bilmirəm. Biz mütləq "Qarabağ" olaraq, şəraitimizi yaxşılaşdırmalıyıq, daha diqqətli olmalıyıq. U-19 komandamızın çoxu daha cavan idi. 17-18 yaşları var idi. İlk dəfə idi belə turnirdə oynayırlar. Amma bu cür klubların futbolçuları beynəlxalq turnirlərdə oynayıb, böyüyə-böyüyə oynayırlar. Onlar 17 yaşından bu cür turnirlərdə iştirak edirlər. Onların şəraitləri danışılası deyil. Avropa futbolu, gənc, uşaq futbolu dedikdə, ilk ağla gələn "Ayaks"dı. Onların şəraitindən danışılası deyil. O klubun şəraiti bizim bəlkə də Azərbaycan futbolunun şəraitindən daha üstündü. Bir neçə klubda olmuşam, akademiyalarına baxmışam. “Barselona"nın, "Borussiya"nın, "Çelsi"nin. Yan-yana qoyulası deyil. Çalışıb əziyyət çəkməli, pozitiv yanaşmalı, inamla baxmalıyıq gələcəyə. Fərq çox böyükdü.

MÜZƏFFƏR QULUZADƏ