"Araz-Naxçıvan" Misli premyer-liqasının 14-cü turu çərçivəsində evdə "Kəpəz"i məğlub etdi - 2:0.

"Football-plus.az" xəbər verir ki, "qırmızı-ağlar"ın baş məşqçisi Elmar Baxşıyev oyunsonrası mətbuat konfransında jurnalistlərin suallarını cavabladı.

- Ağır oyun alındı. Bilirdik ki, kubok matçından sonra komanda şəklində daha çoxunu etmək məcburiyyətindəyik. Komandamı təbrik edirəm, yaxşı oyun göstərdilər. Düşünürəm ki, bu gün bəzi adamların cavabını meydançada artıqlaması ilə verdilər.

- İlk yarım saatda komandaya nə olmuşdu? Sanki sonradan ayıldılar ki, oynamaq lazımdı...
- Futbol elə oyundu ki, matç ərzində hər komandanın üstünlük qazanmaq şansları olur. Biz də kubok matçından sonra o stresi yaşamışdıq. Çalışdıq ki, həftə ərzində bir-birimizə daha yaxın olaq, dəstək verək. Həmin stresi geridə qoyduqdan sonra komanda meydançada kreativliyini artırdı.

- Bu qələbə stresdən tam çıxmağa kömək edəcək?
- Mən stress altında deyiləm. Düşünürəm ki, komandam da mənim kimi rahatdı, öz işini görür. Əlbəttə, uğursuzluq olur. Bu da sırf bizlə bağlıdı. Komanda şəklində daha çoxunu etməyə çalışsaq, müsbət nəticələrə daha yaxın olacağıq.

- Felipe Santosun durumu nə yerdədi? Meydançaya çıxacaq?
- Zədəsi o qədər də ciddi deyil. Məşqlərə başlayıb. Ümid edirik ki, Felipe bu il də komandanın yanında olacaq.

- Mətbuatda haqqınızda yazılanlar sizə təsir edir? Yazılanlara baxırsız?
- Desəm ki, baxmıram...Mahal müəllim məni məlumatlandırır. Bunu sırf indi yaşayıram deyə, işimi onun üzərində qurmamışam. Premyer-liqada 7-ci ilimdi. Hələ rahat ilim olmayıb. Media tərəfdən təzyiqi həmişə yaşamışam. Yenə də, düşünürəm ki, mənimlə heç kimin prinsipi yoxdu. Sadəcə məni bərkitmək istəyirlər.