Erkin Hüseynov özünə quyu qazır.. – İK “Sabah”a boş yerə xəbərdarlıq edibmiş!
AFFA İntizam Komitəsinin sədri Erkin Hüseynov bu dəfə də qəribə açıqlama ilə gündəmə gəlib.
Xatırlayırsızsa, komitənin sonuncu iclasında “Sabah” – “Şamaxı” oyununda tamaşaçılar tərəfindən gətirilmiş qadağan olunmamış əşyalar stadiona buraxılmadığına görə Masazır təmsilçisinə xəbərdarlıq edildi.
Məsələyə münasibət bildirməsi üçün Erkin bəyə müraciət edən “İdmanxeber.az”ın əməkdaşı Həsən Quluzadə qarşı tərəfdən görün hansı cavabı eşidib:
“Stadiona suyun buraxılmaması araşdırıldı. İddialar doğru deyil. Qapağı açılmaq şərti ilə azarkeşlər suyu stadiona keçirməlidi və belə də olub. Heç kimin əlindən suyu alınmayıb. Kluba xəbərdarlıq bunun üçün edilib ki, başqalarına da mesaj olsun. Çünki bu qərarlara başqa klublar da baxır. Onlarda da bənzər problem varsa, aradan qaldıracaqlar. O ki qaldı qida məhsullarının stadiona buraxılmamasına, bu artıq klubun daxili məsələsidi. Hər klubun öz əsasnaməsi var. Avropada da belə hallar olur. Klublar bəzən qida məhsullarını stadiona buraxmır. İstəyən tətbiq edir, istəməyən yox”.
İndi belə anlaşılır ki, AFFA İntizam Komitəsi “Sabah”a qarşı haqsızlıq edib. Yəni məsələ doğru-düzgün araşdırılmayıb və tələm-tələsik qərar verilib. Sonradan üzə çıxıb ki, “bayquşlar”ın bu məsələdə günahı yoxdu. Təbii ki, belədə xəbərdarlıq qüvvədən düşməli və klubun hansısa səhvinin olmadığı haqda məlumat AFFA-nın saytında yerləşdirilməlidi. Ancaq Erkin bəy araşdırma zamanı – aparılıbsa – yol verilən səhvə biabırçı şəkildə bəraət qazandırır. Doğrudanmı, klublara mesaj ötürməyin yeganə yolu hansısa səhvi olmayan komandaya xəbərdarlıq etməkdi?...Həqiqətən də, qulaq gündə bir söz eşitməsə, kar olar. Futbolumuzun belə idarə edilməsinə dözmək üçün kaş nəinki kar, həm də lal olaydıq!
KƏNAN BAHADIR
Digər xəbərlər
