Xavyer Tebasla bağlı sensasiyalı məlumat yayılıb. İspaniya La Liqasının prezidenti cəzalana bilər.

"Football-plus.az" xəbər verir ki, populyar idman qəzeti buna səbəb kimi onun “Barselona” ilə bağlı məxfi maliyyə məlumatlarını açıqlamasını göstərib. Noyabrın 21-də İspaniya İdman İnzibati Tribunalı (TAD) Tebasa qarşı intizam işi açıb.

İttihama görə, 2025-ci il aprelin 2-də La Liqa rəsmi saytındakı bəyanat vasitəsilə “Barselona” tərəfindən verilən məxfi məlumatı ictimaiyyətə elan edib. Qaydalara görə isə belə məlumatlar mühafizə olunmalıdı.

Ötən mövsüm “Barselona”da maliyyə problemlərinin yarandığı hamıya bəllidi. Həmin vaxt Kataloniya klubu 2024-cü ilin yayında “Leyptsiq”dən 55 milyon avroya aldığı oyunçu Dani Olmonu qeydiyyatdan keçirməkdə çətinlik çəkirdi. Həmçinin ölkə nəhəngi əlavə maliyyə problemləri ilə də qarşı-qarşıya idi. Bu vaxt isə La Liqa oyunçuların qeydiyyatdan keçirilməsinə görə icazəni ləğv etmək fikrində idi.

“Barselona” isə Tebası məxfiliyi pozmaqda ittiham edib. La Liqa buna cavab olaraq rəsmi saytından və digər rəsmi kanallardan bəyanatı silib. TAD Tebası günahkar hesab edərsə, funksioner ictimai töhmətdən tutmuş 2 aydan 1 ilədək işdən kənarlaşdırılmaq cəzası ilə üzləşə bilər.