"Azərbaycan yığması çox aqressiv oynadı" - Didye Deşam

DÇ-2026-ın seçmə mərhələsinin son turunda millimiz evdə Fransaya məğlub oldu - 1:3.

“Football-plus.az” xəbər verir ki, oyunsonrası mətbuat konfransında qonaqların baş məşqçisi Didye Deşam jurnalistlərin suallarını cavablayıb.

- Məqsədimiz işimizi görmək idi. İlk hissə çətin alındı. Azərbaycan yığması çox aqressiv oynadı. Nəticədə işimizin öhdəsindən gələ bildik.

- Ekitike və Mateta ilə bağlı fikirləriniz necədi?
- Fürsətlərdən yararlanmağa çalışdılar, yaxşı oynadılar. Qol vurması Mateta üçün yaxşıdı.

- Oyundan əvvəl ilk 5 dəqiqənin məhz belə keçəcəyini desəydilər, buna inanardız?
- Heç vaxt belə düşünməzdim. Oyun 90 dəqiqə davam edir. Təəssüf ki, rəqib aqressiv və dinamik idi. Rəqib qol vursa da, sonradan vəziyyəti dəyişə bildik. Bacardığımızı etdik və qalib gəldik.

- 30 il əvvəl oynadığınız Azərbaycan millisi ilə indi nə oxşar cəhət var? Bir də ki Bakı haqda təəssüratlarınız?
- Dəqiqliklə xatırlamıram. Amma bütün millilərə hörmətlə yanaşıram. İrəliləyiş var. “Qarabağ” ÇL-də oynayır, xallar toplayır. Bakıda əla enerji var idi. Stadionda iynə atsan, yerə düşmərdi. Keyfiyyətli futbolçularınız var. Ukrayna ilə oyunda da bunun şahidi olduq.

- Ləğv olunan qollarda etiraz hakimlərə idi, yoxsa futbolçulara?
- VAR-ın qərarına qarşı çıxmıram. Hər zaman qərarlara hörmət edirəm. Bu qərarları qəbul edirəm. Fürsətdən istifadə edib, Azərbaycan xalqına, qonaqpərvərliyinə görə təşəkkür, Yeni il münasibəti ilə təbrik edirəm.

MÜZƏFFƏR QULUZADƏ