“Tezliklə kluba sponsor tapılacağına inanıram” - icra başçısı şəmkirliləri səfərbər etdi
"Şəmkir”in təşkilatçılığı ilə keçirilən tədbirdə Şəmkir Rayon İcra Hakimiyyətinin başçısı Rəşad Tağıyev, yerli ictimaiyyət nümayəndələri və sahibkarlar iştirak edib.
Əvvəlcə qonaqlara klubun tarixi haqqında videoçarx təqdim olunub, klub rəsmiləri “Şəmkir”in indiki durumu, həyata keçirmək istədiyi layihələr haqda məlumat veriblər. Bildirilib ki, komandanın əsas məqsədi hazırda çıxış etdiyi liqada yüksək yerlər uğrunda mübarizə aparmaq və yuxarı liqalara çıxmaqdı. Eyni zamanda qarşıya qoyulan məqsədlərdən biri də rayonda futbolu, xüsusilə də uşaq futbolunu daha da inkişaf etdirmək, əhalidə oyunlara maraq yaratmaq və oyunlarda iştiraklarını təşviq etməkdi.
İcra başçısı Rəşad Tağıyev klubun yenidən formalaşmasına töhfə vermiş hər kəsə təşəkkürünü bildirib, klub rəhbərliyinin "Şəmkir”in şanlı tarixini bərpa edəcəyinə inandığını vurğulayıb, bu istiqamətdə onlara dəstək göstəriləcəyini bildirib. Futbolun İnkişaf Fondunun icraçı direktoru Tural Piriyev də çıxış edib.
Bu tədbirlə bağlı “Şəmkir”in baş məşqçisi Vüqar Nadirovla danışdıq. Şəmkir elitasının iştirak etdiyi bu görüş sizi ümidləndirdimi? Komandanın maliyyələşməsində, infrastrukturun formalaşmasında yeni səviyyəyə qalxmaq mümkün olacaqmı?
“Əvvəlcə icra başçısı ilə görüşmüşdük. Danışdıq ki, sahibkarlarla da görüşək. Komandada əziyyəti olanlar da çıxış etdi. Kimin əlindən nə gəlirsə, komanda üçün edəcək. Tezliklə kluba sponsor tapılacağına inanıram. Hər şey müsbət oldu. Əlimizdən gələni edirik ki, 2-ci liqada ilk “4-lüy”ə düşək. Biz komandanı gələn il üçün qururuq. Hədəflərimiz gələn mövsümlə bağlıdı. Bu il də əlimizdən gələni edəcəyik ki, ilk “4-lüy”ə düşək”.
ƏSƏD SEYİDOV
