''Qalatasaray''da zədəli futbolçuların son durumları ilə bağlı məlumatlar var.

"Football-plus.az" xəbər verir ki, Çempionlar Liqasının son matçlarında önəmli qələbələr qazanan, amma Türkiyə çempionatının son turunda debütant ''Kocaelispor'' önündə şok məğlubiyyət yaşayan ''Cim-Bom''da 4 futbolçu - İlkay Gündoğan, Lukas Torreyra, Uilfrid Sinqo və Yunus Akgün zədəlidi. ÇL-də ''Bude/Qlimt'' ilə matçdan öncəki məşqdə zədələnərək bir neçə həftəliyə sıradan çıxan Gündoğan artıq məşqlərə başlamaq üzrədi.

Yığma fasiləsi ilə bağlı ''Qalatasaray''da futbolçulara 4 günlük istirahət verilib. Bu müddət tamam olduqdan sonra Gündoğan da məşqlərə qatılacaq. Ancaq onun konkret hansı oyunda dönəcəyi bilinmir. Torreyra ''Kocaelispor''a qarşı son matçın fasiləsində əvəzlənmişdi. Okan Burukun onun yorulduğu üçün əvəzləndiyini demişdi. Ancaq durum qorxulu deyil. Hazırda onun heç bir ciddi problemi yoxdu. Sadəcə son matçdan öncə Torreyra tam sağlam deyildi. Tez yorulmağı da bununla bağlı idi.

4 günlük aranı İtaliyada keçirməyi planlaşdıran, amma sonradan bu planını dəyişərək İstanbulda qalan təcrübəli futbolçu fiziki durumunu yaxşılaşdırmaq üçün əlavə məşqlər edəcək. Sinqo təxminən 1 aylığa sıradan çıxıb. Kot d'İvuarlı futbolçu bir müddət komandadan ayrı trenajor zalında çalışmalı olacaq.

Yunus Akgün isə bel yırtığından əməliyyat olunub. Onun müalicə kursu davam edir. 25 yaşlı futbolçunun hələ ən azı 4 həftə topa toxuna bilməyəcəyi deyilir. Klubun həkimləri onu ÇL-də 5-ci tur çərçivəsində ''Monako'' ilə matça yetişdirməyə çalışacaqlar.