Çempionlar Liqasında son 2 qarşılaşmada qalib gələn ''Qalatasaray''ı bu dəfə çətin Amsterdam səfəri gözləyir.

"Football-plus.az" xəbər verir ki, Türkiyə çempionu sabah liqa mərhələsinin 4-cü turu çərçivəsində ''Ayaks''ın qonağı olacaq.

Bu oyun ərəfəsində ''Cim-Bom'' daha bir önəmli futbolçusunu itirib. İlkay Gündoğanın oynamayacağı əvvəlcədən bəlli idisə, ''sarı-qırmızılar''ın Yunus Akgünün də xidmətindən faydalana bilməyəcəyi məlum olub.

Yunus ''Trabzonspor''a qarşı son oyunda start heyətində meydana çıxmış və ağrıları olduğu üçün 67-ci dəqiqədə əvəzlənmişdi. Tibbi müayinədən sonra onun sol dizində zədə aşkarlanıb. İstedadlı futbolçu artıq bir dəfə bu dizindən əməliyyat olunub. Riskə getməmək üçün məşqçilər korpusunun ''Ayaks''la oyunda onun xidmətindən yararlanmayacağı bəlli olub. Yunus ''Trabzonspor''la oyunda Viktor Osimhenin arxasında, yəni oyun qurucusu mövqeyində qərarlaşmışdı.

Sabahkı matçda Okan Buruk bu mövqedə Qabriel Saranı oynadacaq. Müdafiənin önündə isə Lukas Torreyra ilə Mario Lemina qərarlaşacaq. Yunus Akgün həm ''Qalatasaray''ın, həm də Türkiyə yığmasının aparıcı simalarından hesab olunur. 25 yaşlı solaxay futbolçu bu mövsüm 13 rəsmi oyunda aktivinə 4 qol, 2 məhsuldar ötürmə yazıb. Bu qollardan 2-ni ÇL-də vurub.