“Kəpəz”in sərgərdan həyatının yeni ünvanı Yevlaxdı? – klub rəsmisi cavab verdi
“Karvan-Yevlax”ın Misli premyer-liqasının 12-cu turunda “Kəpəz”ə qarşı keçirəcəyi matç Yevlax şəhər stadionunda baş tuta bilər. Bu barədə “Football-plus.az”a klubun idman direktoru Kənan Kərimov məlumat verib.
Bölgə təmsilçisinin rəsmisi idman qurğusunda ilk oyunun olduğunu da bildirib:
“Yenilənmiş qazonu sınaqdan keçirmək məqsədilə Region Liqasında çıxış edən “Bərdə” ilə yoxlama oyununda qarşılaşdıq. Matçı izləyənlər arasında AFFA-nın və Peşəkar Futbol Liqasının əməkdaşları da var idi. Hazırda onlardan yekun cavab gözləyirik. Stadionda görülən bütün işlər başa çatıb. İnanırıq ki, qurumlardan da müsbət rəy alacağıq və “Kəpəz”ə qarşı ev matçını Yevlax şəhər stadionunda keçirə biləcəyik”.
Kənan bəy “Kəpəz”in ev oyunlarını bu stadionda keçirmək istəyiylə bağlı yayılan iddiaları da şərh edib:“Hələ bir özümüz oynayaq... (gülür). Bizə bu barədə “Kəpəz”dən rəsmi müraciət daxil olmayıb. Bəli, onlar da bizim kimi premyer-liqada qalmaq uğrunda mübarizə aparır. Ancaq bu məsələyə prinsip baxımından yanaşmırıq. Rəsmi müraciət olacağı təqdirdə müsbət cavab vermək ehtimalımız var. Lakin söz sahibi klub prezidenti Şahmar Vəliyevdi. Təklif müzakirə olunandan sonra yekun cavab verilə bilər”.
Xatırladaq ki, “Karvan-Yevlax” 5 xalla 11-ci pillədə qərarlaşıb. Yevlaxlılar sonuncu sırada olan “Kəpəz”dən 2 xal öndədi.KƏNAN BAHADIR
