“Karvan-Yevlax” Misli premyer-liqasının Şamaxıda keçirilən 9-cu tur oyununda “Turan Tovuz”a uduzdu – 1:2.

“Football-plus.az” xəbər verir ki, Yevlax təmsilçisinin baş məşqçisi Azər Həşimov oyunsonrası mətbuat konfransında jurnalistlərin suallarını cavabladı.

- Oyuna hazırlaşmaq üçün 4 gün vaxt var idi. Hesabda öndə olduğumuz vaxt rəqibin qol imkanı olmadı. Futbolda belə hallar olur: yaxşı oynasan da, uduzursan. Sevindirici haldı ki, kapitan Araz Abdullayev bu gün meydana çıxdı. Bəhanələr gətirməyi xoşlamıram. “Karvan-Yevlax” 14 il sonra yenidən premyer-liqadadı. Qarşıda çox oyun var. İşimizi vicdanla, ləyaqətlə görürük, əlimizdə olan imkanlara uyğun iş görməyə çalışırıq. Bu gün komanda əzmkar futbol oynadı. Onlara təşəkkür edirəm. Məğlubiyyətə layiq olmadığımız halda uduzduq. Daha yaxşısını etməyə çalışacağıq. Fərdi keyfiyyətlər öz sözünü deyir. Məşqçi meydana çıxıb futbolçunun yerinə nəsə edə bilməz. "Karvan-Yevlax"ın premyer-liqada qalması üçün əlimizdən gələni edəcəyik.

- Məğlubiyyətə görə səhv kimdədi?
- İstənilən sahədə səhvlər olur. Bu gün komandamın məğlub olması mənim səhvim idi. Çox təəssüf ki, xal qazana bilmədik…

- Kamran İbrahimovun əvəzlənməsinin səbəbi nə idi?
- Kamran ilk hissədən sonra özünü yaxşı hiss etmirdi. Məncə, Əmrah Bulud onu layiqincə əvəzlədi.

- Üstünlüyü əldən verməyinizi necə izah edərdiz?
- 1:0 hesabıyla öndə olanda bir az arxayınlıq yarandı. Mən də istərdim ki, 90 dəqiqənin sonunda sevinən tərəf biz olaq.

- Uğursuz nəticələrdən sonra istefaya göndəriləcəyinizlə bağlı narahatlığınız yoxdu?
- Məşqçinin işi elədi ki, hardasa bir axsama görsə də dəyişiklik etmirsə, deməli, iş görmür. Bəhanə kimi demək istəmirəm, yeni komandayıq. Bacardığımız qədər ən yaxşısını etməyə çalışacağıq. Rəhbərlik tərəfindən də dəstək var. Sadəcə, gözləyirdik ki, öz meydanımızda, azarkeşlərimizin qarşısında çıxış edəcəyik. Amma bu məsələ həllini tapmır. Bu amil də nəticələrimizdə müəyyən qədər təsir edir.