"Onların klublarında daim oynamaları bizim üçün çox önəmlidi" - Siyasət Əsgərov
“Qazaxıstanda təşkil olunan təlim-məşq toplanışı qadın futbolçulardan ibarət Azərbaycan millisi üçün çox önəmlidi”.
"Football-plus.az" xəbər verir ki, bunu AFFA-nın mətbuat xidmətinə açıqlamasında yığmamızın baş məşqçisi Siyasət Əsgərov deyib. O, komandada ab-havanın yüksək səviyyədə olduğunu deyib:
"Belə toplanışlar bizim üçün çox önəmlidi. Beynəlxalq səviyyədə nə qədər çox oyun keçirsək, futbolçularımız bir-birilərini bir o qədər yaxşı anlayarlar. Sevindirici haldı ki, heyətə cəlb olunanlar öz klublarında müntəzəm oynayırlar. Milliyə Rusiya, Türkiyə, Qazaxıstan çempionatından gələnlər var. Onların klublarında daim oynamaları bizim üçün çox önəmlidi. Çünki belədə millinin düşərgəsinə tam hazır gəlirlər".
Əsgərov bəzi futbolçuların zədə səbəbindən toplanışa qatıla bilmədiyini söyləyib:
"Ümid edirəm ki, onlar da tezliklə sağalacaq və qarşıdakı hazırlıqlara qoşulacaq".
Mütəxəssis Qazaxıstan yığmasına qarşı keçiriləcək yoldaşlıq görüşlərində uğurlu nəticə qazanmağa çalışacaqlarını vurğulayıb:
"Komandamız toplanışın sonluğunun yaxşı bitməsi üçün əlindən gələni edəcək. Qazaxıstan yığması ilə iki yoldaşlıq görüşü keçirəcəyik. Hər iki matçı yüksək səviyyədə keçirməyə çalışacağıq. Qarşıda bizi dünya çempionatının seçmə mərhələsi gözləyir. Məqsədimiz həmin oyunlara tam hazır olmaqdı".
Xtırladaq ki, milli oktyabrın 24-ü və 27-də Çimkənddə Qazaxıstan yığması ilə yoldaşlıq oyunu keçirəcək.
