Ukrayna ilə oyundan əvvəl “CBC Sport”un qonağı olan yığmanın sabiq məşqçisi Arif Əsədov Renat Dadaşovun milli komandanın heyətindən uzaqlaşma səbəbi olan qığılcımı oda çevirdi.

O, açıq danışmasa da, nələrisə hiss etdirdi. Dediklərindən belə məlum oldu ki, Renatın heyətdən uzaqlaşdırılması hazırlıqla bağlı məsələ deyil. Əsədov Renatın hansı formada olsa da, həmişə rəqib müdafiəsini təzyiq altında saxlamaq bacarığının olduğunu deyərək sanki oxları başqa yönə çəkdi.

Əsədov uzun müddət millidə işləyib. Hazırda mətbəxin içində olmasa da, düşərgədə yaşananlardan xəbəri var, nəyin necə olduğunu yaxşı bilir. Axı futbolçu nə qədər hazırlıqsız ola bilər ki, birbaşa heyətdən göndərilsin? Ayxan Abbasov Renatı göndərib 22 nəfərlə Polşaya getməyə razı oldu. Renatın varlığı, adının protokola salınması ona heç bir maneə törətmirdi. Deməli, doğrudan da, məsələ fiziki durumla bağlı deyil.

Düzdü, Renatın fiziki durumunda “axsama” ola bilər. Lakin bu heyətdən çıxarılmasına da əsas vermir. Çünki onu heyətə çağıran da, izləyən də, fiziki durumundan xəbərdar olan da Abbasov idi. Kəsəsi, bu məsələdə nəsə bir müəmma var. Yəqin gec-tez tüstüsü çıxar.

MÜZƏFFƏR QULUZADƏ