Müsibəti-Mahir... – REPLİKA
Müsibət, ay camaat...! Görün, Mahir Emreli DÇ-2026-nın seçmə mərhələsində keçirilən Ukrayna – Azərbaycan (2:1) matçından sonra jurnalistlərə açıqlamasında nələr deyib:
“Kayzerslautern”in direktoru və idman direktoru mən ora qayıdandan sonra iclas keçirəcəklərinə söz verdilər. Məşqçilər korpusunun bəyənmədiyim hərəkətləri oldu. Sizdən xahiş edirəm ki, onların yazdıqlarına inanmayın, mənim kiminləsə aramda pis nəsə olub və ya başqa bir şey olub... Hamısı yalandı. Həyatımda ilk dəfədi ki, belə bir şey etməmişəm (gülür). Buna arxayın olun. Mən qayıdacam, görək nə deyəcəklər. Vaxtı gələndə Almaniyanın futbol mentallığına yaraşmayan hər şeyi sizə danışacam”.
Bəli-bəli, o, həmkarımızın “Kayzerslautern”də oynamağa nə vaxt başlayacaqsız” sualını məhz bu cür cavablayıb. Belə demək mümkündüsə, 5 oyundu adının iştirak ərizəsinə daxil edilməməsinin günahını da məşqçilər korpusunun üstünə atıb. Xatırlayırsızsa, o, ötən mövsümdə haqqında yayılan iddiaları təkzib etmişdi, hətta Almaniyanın gündə milyonlarla oxucu tərəfindən ziyarət edilən “Bild” nəşrini böhtan atmaqla suçlamışdı. Hadisələrin axarı Mahirin o vaxt çıxış etdiyi “Nürnberq”in qapısını çöldən bağlamasıyla nəticələndi.
Mahir həmin Mahirdi. Yenə haqqında komandadaxili nizam-intizamı pozduğu haqda xəbərlər yayılıb. Almaniyalı jurnalistlər onun kollektivin ab-havasını pozmaqla məşğul olduğunu iddia edir. Və bizimki yenə ortaya çıxıb yazılanları təkzib edir. Özü də deyir ki, ilk dəfə heç nə etməmişəm. Hələ gülməyinə bax...
Heç şübhəsiz, Mahir bu ifadələrlə öz kökünə balta vurdu. Bu ifadələr “Kayzerslautern”də kimin qulağına çatsa, dərhal Emrelini “qələmini qıracaq”. Belədə bizimki nəinki 1-ci bundesliqa xəyallarını qəlbində “dəfn etməli” olacaq, hətta 2-ci bundesliqa klublarının da “qara siyahı”sına düşəcək. Beləliklə, şirin nağıl sona çatacaq və bundan sonra ən yaxşı halda klublarımızdan birinin bu sözləri paylaşdığını görəcəyik: “Xoş gəldin, Mahir Emreli!”
KƏNAN BAHADIR
Digər xəbərlər
