Yığma komandamızın baş məşqçisi Ayxan Abbasov Ukrayna ilə oyundan əvvəlki mətbuat konfransında “23-lük” barədə sualı cavablayarkən İsmayıl İbrahimlinin zədəli, Ceyhun Nuriyevin isə xəstə olduğuna görə heyətə salınmadığını dedi. Heyətdən kənarda qalan daha bir futbolçu Renat Dadaşovdu. Onunla bağlı səbəb isə çox absurddu: “tam hazır deyil”.

Tam hazır deyil nə deməkdi? Milli komandanın düşərgəsinə gələn futbolçu necə hazır olmaya bilərl? Əslində əsas sual bu deyil. Hazır olmaması normaldı. Çünki İslandiya və Ukrayna ilə oyunlardan sonra cəmi 159 dəqiqə meydanda olub. Beş potensial oyun minimum 450 dəqiqə deməkdi. Renat bunun üçdəbirini oynayıb. Bu futbolçunun hazır olmadığı elə komandasında vaxt qazandığı dəqiqədən, verdiyi “faydadan” bəllidi. Axı hazır olmayan futbolçu düşərgəyə gəlib milliyə bu formanı geyməyi daha artıq dərəcədə haqq edən başqa futbolçunun yerini tutur. Məsələn, tam hücumçu olmasa da, irəli xətdə davamlı oynayan, “Varajdin”də tədricən əvəedilməz oyunçuya çevrilən Rüfət Abdullazadənin. Rüfət oynamasaydı belə, düşərgədə olmaq onun üçün motivasiya olacaqdı. Ayxan Abbasov Rüfətin nəzərində olduğunu deyib, inanırıq ki, növbəti oyunlar üçün çağırar. Amma renatların, mahirlərin komandalarında heç nə edə bilməməsi millidə də bir xeyir verməyəcəklərinə işarədi. Bir ara formasından asılı olmayaraq, Ramil Şeydayev milliyə çağrılırdı, indi də Renat Dadaşov. Yığmamız son bir ildə cəmi iki qol vurub. Düzdü, iki ay əvvəl Macarıstana vurduğumuz qolun müəllifi Renat idi. Amma onda Renat formada idi. Ötən ilin oktyabrından bəri növbəti qolumuzu isə Emin Mahmudov penaltidən vurub. Hər dəfə dörd-beş hücumçu çağrılır, heç bir il ərzində kəmiyyətlərinin yarısı qədər keyfiyyət verə bilməyiblər.

Dünyanın heç bir yerində milliyə çağrılan futbolçunun hazır olmadığına görə heyətdən kənar qalması görünməyib. Hansı prizmadan baxırsan-bax, gülməli ilklər bizim başımıza gəlir. Tərslikdən də formada olan hücumçulardan qıtlıq çəkirik. Yalnız Nəriman Axundzadə ilə Musa Qurbanlı qalır. Onlar da öz komandalarında mövqeyi hücumçu olmayan legionerin ehtiyatında qalıblar. Düzdü, Nəriman əsas hücumçu olanda da yığmaya güclü qatqısı olmayıb. Amma Musa bir ara qol vururdu, indi heç o da yoxdu.

Allahın Farer adaları qədər də deyilik. Bir neçə il əvvəl 6 xal kimi yanaşıb qapazaltı etdiyimiz milli dünya çempionatında iştirak etməyə bizim heç vaxt olmadığımız qədər yaxındı. Son beş oyunda 4 qələbələri var. Ardıcıl üç oyunda qələbə qazanırlar. Rəqiblər də Çexiya, Monteneqro... Camaat DÇ-yə vəsiqə uğrunda mübarizə aparsın, biz də milliyə çağrılan futbolçunun heyətə düşməməsini müşayiət edək. Dərdimiz ağırdı, çox ağır. Amma bu ağır dərdin fonunda da Ayxan bəyin Renatla bağlı davranışı qəribə göründü.

Dadaşov hazır deyildisə, yığmanın düşərgəsində nə gəzirdi? Bir futbolçunun hazır olub-olmadığını bilmək üçün mütləq məşqdə görməlisən?

MÜZƏFFƏR QULUZADƏ