Futbol üzrə ölkə kubokunda 2025/26 mövsümünə srağagün start verildi. 1-ci təsnifat mərhələsinin iki gün ərzində - oktyabrın 9-10-da keçirilən oyunlarından sonra növbəti mərhələyə vəsiqə qazanan komandaların adına aydınlıq gəldi.

Bilindiyi kimi, bu mərhələdə yalnız 2-ci liqa klubları çıxış edir. “Şəki” – “Araz Saatlı” matçında sürpriz qeydə alınmadı. Düzdü, qonaqlar 1-ci hissəni hesabda öndə tamamlaya bildi. Ancaq ikinci yarıda daha yaxşı oyun sərgiləyən “halvaçılar” qələbə hədəfinə çatdı.

“Ağdaş”ı qəbul edən “Qaradağ Lökbatan” rəqib qapısından 8 (!) cavabsız top keçirdi. Əslində bu matçın hər cür müzakirəyə açıq olduğunu deməliyik. Ən azı ona görə ki, xeyli mübahisəli hakim qərarları gördük. Hətta matçın danışılmış oyun olduğunu iddia edənlər də tapıldı. O başqa məsələ ki, matçın favoriti onsuz da Lökbatan təmsilçisi idi. “Dinamo” – “Kür-Araz” qarşılaşması da maraqlı məqamlarla diqqəti çəkdi. Burda “polislər” uğursuz başladığı görüşü qələbəylə başa vurdu. Əlbəttə, belə nəticədə İmişli komandasının hesabda öndə olanda, başqa sözlə, 43-cü dəqiqədə azlıqda qalmasının da payı var. Ancaq buna görə “Dinamo”nun layiqli qələbə qazanmadığını iddia edə bilmərik. Axı onlar əlavə vaxta ehtiyac duyulan matçda daha inamlı göründü...

“Ağstafa Gəncləri” – “Şirvan” oyununda turun növbəti sensasiyası qeydə alındı desək, yanılmarıq. Ona görə ki, qələbəyə daha yaxın olan qonaqlar fürsətləri dəyərləndirə bilmədiyindən meydan sahiblərinin mövsümün ilk qələbəsini qazanmasına “yardımçı oldu”. “Göygöl” – “Şirvan” matçı meydan sahiblərinin aşkar üstünlüyü şəraitində keçdi. Hadisələrin təbii axarı birincilərin qələbə qazanmasıyla nəticələndi. İş ondadı ki, “Göygöl” daha parlaq qələbəyə imza ata bilərdi. Sadəcə, penaltini yerinə yetirmək üçün topun arxasına keçən Ruslan Süleymanov Afiq Musayevlə mübarizədən məğlub ayrıldı. Nəhayət, “Quba” – “Xankəndi” görüşündə qonaqlar qalib gəldi. İnsafən, hesabı açan tərəfin meydan sahibləri oluğunu diqqətə çatdırmalıyıq. Hər halda, qubalılar 2-ci liqanın liderinə çətin anlar yaşatdı. Emin Quliyev 78-ci dəqiqədə penaltini qola çevirə bilməsəydi, bəlkə də “Xankəndi” üçün məyusedici nəticə olacaqdı. Hər halda, lider istəyinə çatdı.

Bizim istəyimiz isə stadionlarda daha çox azarkeşin olmasıdı ki, hələ bu mümkün deyil. Çünki bu mərhələnin ən çox tamaşaçı toplayan matçında cəmi 100 futbolsevər oldu...

KƏNAN BAHADIR